Page 7 - MIN JUS 13 APRIL 2016

Minister Arthur Dowers a despedi di Procurador General
interino di Aruba

Wednesday, 13 April 2016 00:19
Comparti

Memey di un lista di invitadonan pisa for di e seno hudicial, entre nan e Procurador General di Hulanda,
di Corsou y di Aruba, pasobra no ta normal cu tur tres PG ta presente hunto, a tuma luga despedida di e
Procurador General interino di Aruba, esta Mr. Marc van Erve. E evento a conta tambe cu presencia di
Gobernador di Aruba, Minister di Finansa y Minister di Husticia.

"Nos a cuminsa cu un tradicion nobo awe riba Aruba", asina Minister mr. Drs. Arthur Dowers a cuminsa
bisa den su discurso. E mandatario ta corda ainda cu den pasado e unico tradicion cu tabatin ta di
pleitamento constante cu e Procurador General nan cu a sirbi nos pais, na cabes di e aparato hudicial. "E
ora ey hopi biaha sa tin fiesta di despedida pa nan pero cu nan mes no ta presente. Cu e evento awe nos
ta start un tradicion nobo den cual na un forma masha amicabel nos ta despedi di e Procurador General
di nos isla".

Un Procurador General ta un persona cu ta ocupa un funcion masha importante den comunidad pero
tambe den henter Reino Hulandes. No tur ora e trabou ta facil, pasobra ta e persona riba Ministerio
Publico y cu ta determina maneho cu e Fiscalnan ta hiba den nan trabou di conduci investigacionnan
penal.

"Asina mes mi por bisa cu mi a experencia un cooperacion inmenso di parti e PG e ultimo añanan, den
cual nos a traha bon hunto y tambe specialmente un PG cu un balor special pa e ser humano dentro di e
aparato hudicial", asina Minister mr. Drs. Arthur Dowers a bisa den su discurso.

Semanalmente e Minister di Husticia ta reuni cu e Procurador General hunto cu Alto Comisario di Polis y
cu e director di e departamento di Seguridad Nacional pa repasa acontecimientonan di e siman cu a pasa
y premira e siman nobo cu ta cuminsa. Den e reunionnan ey ta delibera masha riba aspectonan di
siguridad di nos pais, e riesgonan y tambe riba maneho di siguridad di nos pais.

Na final Minister di Husticia a gradici Mr. Marc van Erve pa su dedicacion y pa su bon trabou realisa aki
na Aruba. El a entrega e PG saliente un regalo den nomber di Gobierno di Aruba y a disculpa presencia di
Minister Presidente Mike Eman pero den su nomber tambe a gradici PG van Erve pa su envolvimento y
participacion fructifero a base regular den e "Vijfhoeksoverleg" den cual e Minister Presidente tambe ta
sinti y ta dirigi.