Page 27 - JUS

Cuerpo Policial ta bezig reactivando “Polis di Bario”

Publication: Friday, 13 March 2015. Categoria: Policial

Relaciona cu desaroyonan negativonan den e barionan

ORANJESTAD (AAN): Gobiernonan a crea un sistema unda cu ta manda Polisnan den bario y
pa cual a crea un asina yama Polis di Bario. Sinembargo por a constata cu despues di algun
tempo, e postnanaki ta bandona mientras cu e necesidad pa Polis di Bario ta keda existi.

A tuma contacto cu Alto Comisario di Polis Dolfi Richardson, kende a splica cu nan a haya e
opdracht caba di Minister di Husticia pa reactiva e postnan aki. Recientemente Mando Policial
tabatin un encuentro cu Minister di Husticia Arthur Dowers, kende a informa nan di e reunion cu
el a tene den diferente bario unda cu preocupacion a keda expresa di cierto desaroyonan negativo
den e barionan, esta riba criminalidad.

Mesora Cuerpo Policial a cuminsa traha riba un plan integral cu lo bira e maneho pa e proximo
lunanan pa ataca e diferente problema cu e ciudadanonan a keda confronta cune den e diferente
barionan. Segun Alto Comisario, a cuminsa mobilisa mas Polis den e barrionan, pero a cuminsa
tambe cu e proceso pa yena e diferente postnan di Polis di Bario cu a keda bashi.
“Nos lo bay percura pa cada barrio, pero principalmente esnan problematico, tin un Polis den e
barrio pa trata di alivia e situacion y ya caba e siman a cuminsa cu e seleccion di e candidatonan
pa e postnan.” El a enfatisa cu no tin problema cu e tipo di trabou aki, pero esnan cu tabata ocupa
e funcionnan aki a haya promocion y a bay ocupa otro funcion. Y awor tin un otro grupo cu a
haya promocion y for di esaki ta bay saca algun persona cu ta capacita pa e trabou di Polis den
Bario.
“Como Polis nos mester por funciona unda cu ta, nos no conoce areanan cu ta dificil pa Polis.
Como hefe di Cuerpo Policial mi no por acepta cu e Cuerpo no ta funciona tur caminda. Asina cu
nos ta cla pa yena e cuponan aki, nos lo hacie.”

El a desmenti totalmente cu lo tin Polisnan cu tin miedo pa traha den cierto areanan
problematico. Si ta e hecho cu tin rumor cu e funcionarionan policial no kier bay traha pa no
actua contra cierto hobennan y despues ta haya nan mes dilanti BIZO (cu ta controla actuacion di
Polisnan).