Page 30 - JUS

Minister di Husticia a bishita algun bario problematico

Publication: Friday, 13 March 2015. Categoria: General

“Esaki ta un problematica cu mester wordo atendi for di diferente angulo”

ORANJESTAD (AAN): Minister di Husticia Arthur Dowers, hunto cu Hefe di Cuerpo Policial,
a bishita algun bario cu ta wordo considera problematico pa e cantidad di delitonan cu ta keda
registra na e luganan aki.

Despues di reuni cu e habitantenan, e mandatario a dicidi pa bishita e barionan mes na diferente
ora pa mira con e hendenan ta biba, ta combersa cu nan. E mandatario, despues di scucha
diferente habitante den diferente bario, a conclui cu e ta un problema cu mester wordo atendi for
di diferente angulo y no solamente for di e banda di husticia.

“Polis y Husticia so no por soluciona e problema aki.” E ta problema di vivienda, aspecto social,
enseñansa, pues varios cos cu e ta kere a bay malo den e barionan aki pa hopi aña.

Pero mas cu tur cos, Minister Dowers ta kere cu e barionan mes ta malo, den e sentido di e forma
cu nan a wordo construi, pa cual e ta kere cu FCCA como responsabel ta fayando. E ta bisa den
sentido cu e doño mester mira ki parti di e barrio ta bay atras y trece solucion pa esaki prome cu
e crea problema, p.e. social. Na hopi di e barrionan bishita, e habitantenan a bisa cu e
condicionnan di bida den e barrio no ta esun mas optimal. Pesey a haci un apelacion na FCCA pa
sinta na mesa cu Ministerio di Husticia pa busca solucion pa e problemanan. E no ta kere cu e
solucion pa yama Polis cada biaha cu tin problema.

Awo Gobierno ta haya su mes obliga pa pasa cierto ley cu por tuma medida contra hendenan cu
ta biba den un cas, sea propio of di FCCA, y no ta percura pa e keda debidamente uza.

Minister Dowers den e bishita den bario a constata cu tin basta cas di FCCA cu ta bashi, siendo
cu por scucha cu tin hopi hende ta busca cas. Un cas bandona, por wordo destrui. Di otro banda,
e ta kere cu si tur hende cera cabes pa traha hunto na mantencion di un bario, e situacion lo ta
hopi mas bon. “Cuerpo Policial ta analisa e parti di siguridad y no ta traha riba mantencion di
bario. Tin areanan cu ta di doño di e proyecto cu mester tuma responsabilidad pa wanta esaki
limpi, pa e decadencia no plama pa resto di area.”