Page 62 - MIN JUS 27 OCT 2015

“High season” pa trafico pisa y intentonan di crimen ta den
porta

Publication: Tuesday, 27 October 2015. Categoria: General

Minister di Husticia:

ORANJESTAD (AAN): Minister di Husticia
Arthur Dowers den un entrevista dialuna expresa cu e yegada di fin di aña ta marca tambe e
cuminsamento di e “high season” pa trafico pisa y intentonan di crimen.

E mandatario a bisa cu ta retonan cu husticia y polis tradicionalmente ta keda confronta cune cu
mas intensidad durante di e temporada di fin di aña y e cuminsamento di un aña nobo.

El a menciona cu den trafico ta dos factor principal ta hunga un rol den e cantidad di accidentnan
cu ta tuma luga: coremento duro y coremento bao di influencia di alcohol. Ta cosnan cu en
realidad ta rekeri poco esfuerso di parti di comunidad pa contribui na reduccion di e cantidad di
accidentnan, cu ta trece daño personal y daño material indesea.
Dowers a haci un apelacion na tur miembro di comunidad pa tene cuenta cu “bebouwde kom” y
velocidadnan maximo den diferente area y pa no bebe y core auto. Tur persona cu ta participa na
trafico mester ta mas consciente di nan responsabilidad como persona cu ta participa den trafico
y ta mas consciente di e consecuencianan cu comportacion iresponsabel por tin pa nan mes y pa
otronan.

Lo pone polisnan adicional riba caya pa haci mas control, manera ta custumber caba pa hopi aña,
el a agrega. Sinembargo, Dowers a subraya, e prome responsabel y prome yama pa asumi su
responsabilidad ta e persona cu na stuur.

E otro punto di atencion principal, cu en realidad continuamente tin atencion di autoridadnan ta
ladronicia y atraco, unda cu, manera Dowers a expresa, criminalnan ta bay purba busca un bonus
pa nan mes pa medio di horta cos cu no ta di nan.

Aunke tin hopi detencion ta tuma luga y hopi caso ta wordo resolvi, e mandatario a bisa, cada
atraco of ladronicia ta conta y ta uno di mas.