Page 119 - Балдарга 2023_Neat
P. 119
ӦСКӰС-УУЛ
(туујы)
Айлу-кӱндӱ Алтайда –
Айдылбас јараш талада
Арчын јыды јытанат,
Агын суузы аҥданат.
Сӱмер туулар сӱӱнчилӱ
Кӱнге омок јалтырайт.
Куштар ӱни аркада
Кӱннеҥ кӱнге токтобойт.
Эркин-Мерген айлында
Эмди артты јаҥыскан.
Карудаҥ кару ада-энези
Тустап јажына атанган.
Адазынаҥ калган баркызы
Ӧлӧ-чоокыр бее болор.
Энезинеҥ арткан јӧӧжӧзи –
Эптеп јабынар јуурканы.
Эркин-Мерген эрикпей,
Кунук санаага алдыртпай,
Боос беезин эчидип,
Байлык одорго јетирет.
Омо-томо кожоҥдоп,
Эҥирге јетире ол кӱдет.
Эртен тура бӱрӱҥкӱй –
Бениҥ ачу оҥтожы.
Эркин-Мерген ойгонды,
Беезине меҥдеп јӱгӱрди.
– Кулун чыкты, кулун чыкты! –
Эркин-Мерген кыйгырды.
Чаҥмак башту кулунныҥ
Чаҥмагынаҥ окшоды.
119
