Page 121 - Балдарга 2023_Neat
P. 121
Олорды ээчий барзын деп,
Терепшилеп баштады.
Олорды ээчип барбаска,
Чолмон калыйт, туйлайт.
Мойнындагы армакчы
Там ла кезе тартылат.
Анча-мынча болбоды,
Тыныжы буулды аттыҥ.
Маҥдык јажыл ӧлӧҥгӧ
Тизеленип ол јыгылды.
Эркин-Мерген адына
Тӱрген-тӱкей јӱгӱрди.
Бажынаҥ тудуп турганча,
Тыныжы оныҥ токтоды.
– Калан тӧлӧп болбодыҥ! –
Каткырыжат јалчылар. –
Удабай бойыҥды аларыс,
Кул-јалчы эдерис!
Эркин-Мерген ыйлап-сыктап,
Эбире базат Чолмонды.
Јаҥыскан эмди артканын
Јаҥы ла кӧӧркий оҥдоды.
Тизе бажына отурып,
Кӱнчыгышка баштанып,
Ачу ыйлап, комудалын
Айдып турат Эркин-Мерген:
– Арысканду тууларым,
Агып јаткан сууларым,
Ачу сызым бадышпайт,
Айтканымды кем угат?
Кӧк-Теҥери Кудайым –
Кӧргӧн јаҥыс куйагым,
Слердеҥ болуш сурайын,
Чолмоным канай ундуйын?
121
