Page 8 - Балдарга 2023_Neat

– О-о-о, кандый кайкамчылу! Коркымчылу болбой? Анда кижи кӧрбӧгӧн
аҥдар јӱрӱп јат дезеҥ? – деп, Мӧҥӱн-Сай чочып калган ӱниле, ыйлаарга
тургандый, араайын сурады.
– Баштап тарый коркымчылу болгон. – Балдар оныҥ куучынын јарадып
турганын билип, Эзлик саҥ ӧрӧ, теҥери јаар кӧрӱп, куучынын улалтты ла.
– Бир эмеш соок болгон. Оноҥ ӱрениже бергем. Бу јердеҥ ле кӧрзӧҥ, ай кан-
дый да сары ӧҥдӱ. Ондо эмеш башка, јарык. Ичимде санандым: айды эбире
базып кӧрбӧгӧнчӧ, јанбас. Ийдимле экӱ јол-јорукка кӧндӱгип ийдис. Та узак
басканыс, та ас. Ыраакта јаан ак айыл турганын кӧрӱп ийдим. Бу не атазы?

Мында айыл кайдаҥ келген болотон деп сананып, токтой тӱштим.
Балдар Эзликтиҥ јилбилӱ куучынын угарга, кемизи де кыҥыс этпей,
чого тургулай берди.
– Ак айыл кӧрӱнген деп айттым не. Оныҥ јанында јаан јодро агаш
ӧзӱптир. – Эзлик ойто ло саҥ ӧрӧ кӧрӱп, куучынын улалтты ла. – Айылга
јууктап келзебис, балдар ойногылап јат. Бого балдар кайдаҥ келген боло-
тон деп, чек кайкадым. «Слер кажы јердиҥ балдары?» дезем, олор айдыш-
ты: «Бис мында ла јуртап јадыс. Бис – Јелбегенниҥ балдары».
– Чып-чын. Айда Јелбегенниҥ јуртты бар деп, јаанам куучындаган –

деп, шыпылдууш Айана билеркеп айтты.
– Ол чӧрчӧк – деп, Амыр билеркеди.
– Кемге де – чӧрчӧк, кемге де – чын. – Эзлик Амыр јаар кезем кӧрӧлӧ,
куучынын улалтты ла. – Јелбегенниҥ балдарыла таныштым. Ады-јолдоры
да саҥ башка эмтир.

8