Page 5 - Сістэмны даведнік-бібліятрансформер_Neat

Масла Алена Сцяпанаўна – беларуская дзіцячая пісьменніца, аўтар шэрагу
кніг казак, журналіст - нарадзілася ў 1967 годзе ў в.Мілашова. Пасля заканчэння Міёрскай СШ
№2 з медалём, дзяўчына паступіла на журфак БДУ. Працавала пераважна ў дзіцячай
журналістыцы (газеце “Піянер Беларусі” (“Раніца”), часопісе “Качели”, была галоўным
рэдактарам газеты “Переходный возраст” і часопіса “Бярозка”, загадчыцай рэдакцыі дзіцячай
літаратуры выдавецтва “Мастацкая літаратура”. Член рэдкалегіі часопіса "Вясёлка" і дзіцячых
часопісаў выдавецтва "Пачатковая школа", дзе змяшчае свае апавяданні. З 2014 года – аспірантка,
а потым супрацоўнік кафедры літаратурна-мастацкай крытыкі Інстытута журналістыкі.
Масла Алена Сцяпанаўна—уладальнік літаратурнай прэміі імя Васіля Віткі (2012),
“Залаты Купідон – 2010”, у намінацыі “За лепшы дзіцячы твор”, узнагароджана дыпломамі
чытацкіх сімпатый Беларускай Бібліятэчнай Асацыяцыі (ББА) за 2006 і 2013 гады (зборнікі
“Рождество у крестной”, “Таямніцы закінутай хаты”,”Вандроўка з божымі кароўкамі”). У 2007
годзе ўзнагароджана Ганаровай граматай Беларускага дзіцячага фонда. У 2008 годзе
ўзнагароджана Ганаровай граматай Міністэрства інфармацыі Рэспублікі Беларусь за плённую
працу ў кнігавыдавецтве. Кніга “Прыгажуня” заняла першае месца на нацыянальным конкурсе
“Мастацтва кнігі”. 2019 год — Лаўрэат Міжнароднай літаратурнай прэміі Біянкі у намінацыі
«Казка», за кнігу «Балотныя прыгоды. Цікавінкі ад Бульбінкі і Журавінкі».
Мультфільм, створаны па апавяданні “Лагодны воўк”, стаў лепшай анімацыяй на
кінафестывалі “Лістапад” у 2018 годзе.
Алена Масла—творчая асоба. У 2011 распачала праект “Мілашоўска-Мілашаўскія
чытанні”, на якіх успамінаюцца ўсе таленты, якія нарадзіліся на Міёршчыне. Таксама з’яўляецца
аўтарам ідэі стварэння на радзіме мастацкай галерэі з незвычайнай назвай “Пуня”.
Казкі Алены Масла—гэта цікавыя і павучальныя гісторыі, без узроставых межаў, якія
прымушаюць задумацца аб сваіх учынках—“дзецям і дарослым падказкі”.
“Жыццё самай маленькай казюркі на зямлі—з’ява цудоўная і непаўторная. А чалавек
толькі тады мае права называцца найразумнейшым у прыродзе, калі шануе акаляючы свет і
разумее, што Зямля—дом для ўсіх, хто на ёй жыве”,—піша Алена Масла. Казкі “Вандроўка з
божымі кароўкамі”, “Як пані Чаротная на госці ў Палангу бегала”, “Балотныя прыгоды” маюць
экалагічную накіраванасць.
Інтрыгуючыя назвы казак (“Мяне завуць Лахнэска”, “Таямніцы закінутай хаты” і інш.),
займальны сюжэт, прытчавасць некаторых твораў зацікавяць, прымусяць задумацца не толькі
юнака, але і дарослага чалавека. Казка не мае ўзроставых межаў, яна звернута да таго дзіцяці, які
ўсё жыццё жыве ў чалавеку. У яго душы, у яго сэрцы, у яго пачуццях. Казачныя сюжэты Алены
Масла сугучныя жыццёвым клопатам малых і дарослых.
Алену Масла можна назваць адной з самых вядомых і тыражных казачніц Беларусі. Яе
кнігі любяць і чытаюць. Яе творы перакладзены на многія мовы і выдаюцца ў розных краінах. З
самых экзатычных—рэспубліка Мары Эл, часопіс "Ончыко". Часопіс “Дзіцячая раман-газета”
(Масква) за кастрычнік 2019 г змяшчае пераклады казак Алены Масла.
Асобныя творы Алены Масла ўключаны ў зборнікі серыі “Школьная бібліятэка”
(“Пакліч у госці”, “Цудадзейны карагод”).
Дзейнасць пісьменніцы вельмі шматгранная. У 2009 годзе ў выдавецтве "Мастацкая
літаратура"выйшла кніга казак Уладзіміра Караткевіча “Лебядзіны скіт", укладальнікам якой
з’яўляецца Алена Масла. У музеі кнігі Нацыянальнай бібліятэкі ў рамках праекта «Клуб кніжных
прафесараў» прайшлі музейныя чытанні. Дзеці чыталі казку «Мяне завуць Лахнэска» разам з яе
аўтарам.
5