Page 55 - MIN JUS 16 SEPT 2015
P. 55
Minister Dowers ta pidi pa mas envolvimento cu hobennan di parti di
comunidad
Publication: Wednesday, 16 September 2015. Categoria: General
ORANJESTAD(AAN): Minister Arthur Dowers dialuna a reuni cu gremionan tocante siguridad
na Aruba. Durante di e encuentro a presenta tanto e plannnan general pa cu prevencion di crimen
pa pais Aruba den su totalidad, como tambe e esfuersonan cu ta tumando luga desde 2009.
Tabatin representantenan di gremionan cu periodicamente ta intercambia cu husticia y
representantenan di gremionan cu tradicionalmente no ta na e reunionnan regular.
For di aña 2009 tabatin inversionnan sumamente grandi den husticia, siguridad y enseñansa cu a
duna tambe bon resultado. Minister Dowers a agrega cu si wak trendnan mundial ta wak cu tin
bao di e hobennan un aumento di problema di comportacion.
Dos factor determinante den e problemanan ta e falta di un nucleo familiar fuerte pa sostene nan,
como tambe e aumento den presencia y uzo di droga; nan ta crea risiconan grandi pa e hobennan.
Esaki ta presenta retonan grandi pa tur pais, particularmente pa paisnan chikito manera Aruba,
Minister Dowers a expresa.
El a bisa cu tin dos punto importante, esta cu basicamente tur hende presente a mira cu e
esfuersonan cu a y ta worde haci ta duna resultado, y cu por wak cu a inverti hopi placa den e
sectornan di enseñansa y husticia pa trece cierto cantidad di siguridad.
E situacion ta uno dinamico y cada bez di nobo ta evalua tur diferente factor basa riba e trendnan
y desaroyonan na Aruba pa asina determina cuanto y con tin cu sigui haci inversionnan.
Minister Arthur Dowers a subraya cu e parti aki no ta cay cerca e minister di husticia so, pero ta
toca parlamento y tur partner social tambe. Ta esencial pa tur hende den e comunidad den su
totalidad y e partnernan social, banda di e trabao di ministerio publico, cuerpo policial y
hueznan, inverti tambe den e desaroyo di hobennan, Dowers a agrega.
Ta keda semper risico di banda di e hobennan cu ta causa y contribui na crimen, pero no mester
lubida tambe esunnan cu ta bin for di exterior pa comete crimennan riba e isla.
Mundialmente tur instancia ta consciente di e risiconan cu globalisacion a trece cune, como cu
criminalnan no ta respeta fronteranan y ta purba unda cu nan por di haci daño na hende.
