Page 57 - MIN JUS 16 SEPT 2015

Sindicato ABV a participa na reunion encuanto husticia

Publication: Wednesday, 16 September 2015. Categoria: General

ORANJESTAD(AAN): President di sindicat ABV, Gina Maduro tabata entre e representantenan
di gremionan sindical cu a participa na e reunion cu e ministernan di husticia y enseñansa riba e
topico husticia cu a tuma luga dialuna. E reunion a resulta den un dialogo basta largo unda a
repasa puntonan di protocol firma cu Minister Arthur Dowers dia 13 di augustus 2013.
Maduro a splica cu e reunion a worde organiza basa riba un peticion di gremionan comercial y
sindical, esta FTA, AHATA y ATIA y a inclui diferente presentacion aparte di e comberasion
tocante di e contenido di e protocol.
Minister di Husticia a duna un resumen di kico a a worde implementa caba basa riba e protocol.
E titular di husticia tambe a splica cifranan di casonan cu for di 2013 ta worde inventarisa na e
forma cu e mester worde haci. E cifranan aki a inclui informacion tocante ladronicia den auto,
ladronicia di auto, ladronicia den casnan, etc.
Minister Michelle Hooyboer-Winklaar di enseñansa a presenta e cambionan cu ta andando den e
sistema di enseñansa y a introduci e “Nationale Gedragscode” cu lo worde introduci y
implementa pa dia 1 di oktober. Maduro a splica cu e documento ta splica e rol di mayornan,
maestro y bestuur di school den e sistema di enseñansa. A papia bastante tocante situacionnan cu
ta afecta of ta worde afecta pa hubentud durante di e reunion.
Gina Maduro a remarca cu Dowers a duna por ehempel tambe un splicacion di e proyecto di
camara cu gobierno ta bezig ta implementa.
El a bisa cu e splicacion tocante tendencianan y e esfuersonan cu ta tuma luga “tras di Cortina” a
duna claridad riba diferente informacion importante manera e teamnan specialisa di polis cu ta
worde forma pa investiga y traha riba cierto casonan specifico. El a conclui bisando, “nan ta
haciendo nan trabao si”.
http://www.diario.aw/2015/09/sindicato-abv-a-participa-na-reunion-encuanto-husticia/