Page 78 - MIN TTC SEPT 18, 2015

Preocupacionnan di empleadonan a haya atencion inmediato
di Gobierno

Publication: Friday, 18 September 2015. Categoria: General

Minister Oduber a reuni cu empleadonan di Renaissance

ORANJESTAD (AAN): Diahuebs mainta un grupo di empleadonan di Renaissance a pidi
Minister Otmar Oduber atencion pa nan preocupacion cu introduccion di e proyecto di
Parkeermeters.

E representantenan a sinta na mesa cu e mandatario y gerencia di Aruparking, unda den un bon
ambiente a ricibi hopi informacion di henter e proyecto y nan caso specifico.

Minister Oduber a trata cada un punto di preocupacion cual entre otro tabata e aspecto di
siguridad specialmente anochi pa esunnan cu ta traha warda.

E mandatario a comenta cu ya caba tin personal di siguridad y tin un plan pa aumenta e cantidad
di personal di siguridad den e areanan concerni. Sr. Oduber a describi tambe cu ya ta trahando
diferente toren nan pa e personal di siguridad por tin un miho bista riba e areanan. A corto plaso
por menciona tambe cu Aruparking ta trahando di cerca cu NV Elmar pa añadi mas iluminacion
den e areanan mas critico.

Sr. Oduber a splica tambe cu a ofrece gerencia di Renaissance e opcion pa un area completo,
destina pa nan empleadonan, di cual no a ricibi reaccion manera a spera. A haci un di dos oferta
siman pasa y no a haya un contesta definitivo riba e proposicion.

Un rato prome cu e reunion cu e empleadonan, gerencia di Renassaince a bay di acuerdo cu e
proposicion di Aruparking pa tin un espacio adicional, banda di nan tres parking lotnan, destina
pa nan trahadonan. Awor e empleadonan por ta mas trankil riba e inkietud di nan espacio pa
staciona nan vehiculonan.

E trahadonan a keda hopi satisfecho cu e informacion ricibi y a gradici Minister Oduber pa a
sinta cu nan na mesa. E mandatario a enfatisa cu e ley nobo di parkeer den centro di ciudad lo
traduci su mes den clientenan contento y peatonnan cu por cana trankil riba acera sin cu autonan
mal staciona ta stroba nan.

Claro cu a haci y lo sigui haci tur esfuerso pa acomoda tur esunnan cu ta traha den e area, pa nan
por logra haya un espacio pa parkeer. Pero na final di cuenta, mas parkeerplaats pa cliente lo
traduci den mas oportunidad pa negoshi pa tur e tiendanan den e mallnan, e casinonan y pa e
hotel mes!

http://www.diario.aw/2015/09/preocupacionnan-di-empleadonan-a-haya-atencion-inmediato-di-
gobierno/