Page 88 - MIN.TTC MARCH 9,2015

Southwest Airlines y Aruba marcando historia hunto atrobe

 Mar 9th, 2015
 Local

Tabata dia 1 di Juli 2014, cu Aruba tabatin e honor di ricibi e prome vuelo internacional di
Southwest Airlines for di Merca pa Aruba. Tabata Southwest su prome vuelo internacional y
Aruba tabata parti di e grupo selecta di destinacionnan den Caribe unda cu Southwest a cuminsa
cu e etapa nobo aki di e compania. “Awe, 8 luna despues, nos ta honra atrobe pasobra William P.
Hobby Airport na Houston lo ricibi su prome vuelo internacional, anto ta cu Southwest Airlines
y for di Aruba”, asina Ronella Tjin Asjoe-Croes, C.E.O. di Aruba Tourism Authority a bisa den
su discurso diasabra merdia na aeropuerto, den presencia di ehecutivonan di Aruba Airport
Authority, Aruba Tourism Authority y Southwest Airlines. Diasabra a celebra e prome vuelo
nonstop di Southwest for di Aruba pa Houston.
Atrobe por bisa cu Aruba y Southwest Airlines ta marcando historia hunto. Pa esaki e ehecutivo
di Aruba Tourism Authority a gradici Southwest Airlines pa e “partnership” y pa e confiansa cu
nan a deposita den nos mercado. Despues di a dal un prome paso 8 luna pasa, ya ta tuma un otro
paso asina ki, cual sigur ta refleha e exito di e “partnership” aki.
Di parti di Aruba Tourism Authority, nan lo sigui haci tur esfuerso pa mantene e posicion di nos
isla como un di e destinacionnan preferi di Mericanonan pa pasa dianan di vakantie. Parti di e
esfuersonan aki ta inclui un bishita na medionan di comunicacion na Houston e siman aki, pa por
sigui promove e vuelo y pa cera e mercado aki aun mas conoci cu nos isla como un destinacion
ideal pa e habitantenan di e region ey.