Page 83 - MIN.TTC MARCH 9,2015

Dangui Oduber pa ignorancia tin problema pa compronde

Publication: Monday, 9 March 2015. Categoria: General

ORANJESTAD (AAN): Den un combersacion cu Minister encarga cu Arubus, Otmar Oduber, a
papia entre otro di un declaracion di Dangui Oduber, di fraccion di MEP, kende a cuestiona
declaracion di e mandatario riba hacking di cuenta di Arubus.

Mientrastanto, e caso di hacking a finalisa na Hong Kong y Arubus a haya un gran parti di e
suma aki back, kitando e gastonan di Corte y di Abogado. Bayendo riba e declaracion di Dangui
Oduber, Minister Oduber a expresa cu “mi ta kere cu Dangui Oduber tin un problema pa
compronde.

Tin biaha por pensa cu e persona falta conocemento, pero ora cu bira cierto punto ta simplemente
ignorante. Ora cu bo ta ignorante, bo ta puntra pa bo haya sa.” Minister Oduber a duna di conoce
cu den e proceso a worde splica na diferente ocasion cu mester a bay Corte entre 4 pa cinco
biaha. E prome biaha mester a bay Corte pa pone beslag riba e cuenta.

E di dos biaha mester a bay Corte pa demostra cu e placa ta pertenece na Arubus, cu pruebanan
cu e cuenta a worde gehack y cu e compania di transporte mester haya e placa back. Despues di a
gana e caso, mester bay Corte atrobe pa haya un decision di Huez cu e placa enberdad por worde
libera. E sistema di Hong Kong, e mandatario a bisa, ta diferente cu e sistema di Aruba. Ta
berdad, e ta bisa, cu Parlamentario Danqui Oduber a haci un serie di pregunta di cual e tin tur e
contestanan cla caba cu ta bay worde manda p’e, compaña cu tur e corespondencia di e
procedura di Corte cu tin na Hong Kong. E pakete ta contene tambe e carta di Abogado di
Arubus, den cual e ta informa e decision cu a worde tuma door di Corte dia 28 di januari cu Huez
a duna ordo pa libera e suma cu mester worde manda pa un cuenta di Arubus. E mandatario a
recorda cu tin hopi cos cu no por worde expresa via di medionan di comunicacion, pa cual e ta
spera di por haya e chens pa bay Parlamento pa papia riba e puntonan aki. “Mester tin cautela
necesario pa no divulga asuntonan di siguridad. Pero nos sa cu na e momentonan aki tin un
investigacion tumando luga door di Ministerio Publico. Na final di e investigacion aki, nos lo
mira cual lo ta e resultado.”

http://www.diario.aw/2015/03/dangui-oduber-pa-ignorancia-tin-problema-pa-compronde/