Page 4 - bnd nov 10

A4
EDITORIALDiamars 10 November 2015
Enseñansa un biaha mas den mira
Problemanan financiero ta cuminsa
mustra nan consecuencia
Den e ultimo simannan nos ta tende mas di
e problema den enseñansa, y den varios tipo
di enseñansa. Pa basta tempo caba e debate
fuerte riba kico mester sucede den enseñansa
secundario, y specificamente den HAVO/VWO a
domina escenario. Ultimo noticia tabata e retiro
boluntario repentino di tres persona clave di e
hunta di supervision di Stichting Middelbaar
Onderwijs Aruba (SMOA).
Den tur tres caso nan a declara cu no tabatin
ningun problema interno cu a hiba na nan
decision y a indica otro preocupacion cu mester
di nan atencion, sin e suficiente tempo pa dedica
na e tarea importante aki. Nos no tin motibo
pa cuestiona nan sinceridad, pero e asunto ta
keda mustra straño por lo pronto. Cu tempo
nos lo haya sa si e salida tabatin algo di haci cu un estilo di bida mas saludabel si nos no ta ni pone
presion di banda gubernamental pa crea espacio
pa otro maneho den un composicion nobo di e
directiva. Esaki specificamente pa loke ta nan
interpretacion di e caminda cu e mehoracion den
enseñansa secundario mester tuma.
Esey lo depende tambe di e miembronan nobo cu
lo bay reemplasa nan. Loke te dia di awe nos no
por a mira un avance aden, ta e discusion cu e
otro actor principal cu ta e mandatario di turno,
cu aparentemente ta keda pone enfasis riba
normanan suave di acceso, mientras cu no ta esey
ta e issue principal.
E issue realmente no ta si mas o menos mucha
ta haya acceso na HAVO/VWO, pero con nos ta
mehora ‘across the board’ e prestacion intelectual pasobra den nan estudio despues nan mester di un
di nos hubentud, tumando na cuenta cu nos mester
opera mas y mas den un mundo cu simplemente
ta exigi esey.
Mientras tanto tin otro problema grandi a surgi,
cu den e tempo nos dilanti lo bay bira mas grave
ainda y esey ta cu e medionan financiero pa
enseñansa ta birando mas scars. Presupuesto
2014 tabata menciona un suma di 281 miyon
florin pa enseñansa den su totalidad, mientras cu
na 2015 esaki a baha te na 262 miyon. Algun di e
tiponan di enseñansa cu mester a entrega pisa den
nan presupuesto tabata por ehemplo EPI, unda
a bay di 22,5 miyon (2015) na 20,2 miyon na
2015. Pa 2016 e presupuesto lo bay subi un tiki
atrobe, pero no ta yega na nivel di 2014 y ademas
nos no a mira un presupuesto definitivo ainda.
Kico ta e consecuencia imaginabel di tur esaki?
Cu e scolnan no tin tur facilidad y material
cu realmente ta necesario pa por funciona
optimalmente. Por ehemplo: facilidad deportivo
bon no ta un luho, pero nos sa cu no ta EPI so
ta carece di esakinan. Keto bay nos tin hopi scol
basico y secundario cu no tin e facilidadnan pa
educacion fisico cu nan mester. Y ta aki ta unda
nos no ta mira nada di vision, y sigur no vision
integral. Parce cu ora mandatario ta papia henter
ora di vision, bo mester sospecha cu net nan no
tin.
Con nos tin pensa di contra aresta e tendencia
di un nivel di salud di nos pueblo cu cada bes ta
bay mas atras, causando cada bes mas problema
y gasto di salubridad publico, y nos no tin ni e
capacidad pa brinda nos hubentud un nivel drechi
di educacion fisico? Con nos ta siña nos hubentud
prioridad na e medionan necesario den enseñansa
pa por siña nan esey, no cu palabra bunita, pero
den practica di tur dia.
No ta cu nos no ta aprecia cu e mandatario actual
ta purba haci su best pa mehora enseñansa y cu
e ta bin cu un forma di aprecio pa esunnan cu
ta haci un esfuerso sobresaliente den enseñansa: e
appel di oro como simbolo di excelencia.
Pero unda e competencianan escolar a keda cu
mester bay stimula e alumnonan mes, na tur
tipo di enseñansa, pa purba logra excelencia, den
maneho di idioma, matematica, ciencia, deporte,
arte, etc.? Unda ta keda e estimulo masal pa logra
cu nos hubentud ta lesa atrobe (y no Facebook so),
formacion intelectual mas amplio, si no menos
y menos nan lo tin acceso na estudio avansa den
exterior.
Nos no por djis manda nan bay lesa, lo mester
haci algo mas pa haci esaki berdaderamente tuma
luga, pasobra e ta algo interesante pa haci.
Unda e inversionnan ta keda den renobacion di
enseñansa pa nos conecta miho ainda cu e mundo
digital di awendia? Nos ta lesa cu placer cu Aruba
den turismo ta e isla di Caribe mas digitalisa, pero
esey no ta gracia na, sino a pesar di nos sistema di
educacion cu ta kedando atras den e desaroyo aki.
Y tur e inversionnan aki no ta tuma luga pasobra
no tin placa, fruta di e malgastamento di placa na
otro cos menos importante. Esaki ta haci cu, ora
nos yega mes na un consenso riba enseñansa, nos
no tin recurso financiero pa realisa nada. Vision,
unda?q