Page 30 - EXTRA28NOV2015

30 Djasabra 28 Novèmber 2015
E Tribon
E tribon generalmente ta un di e animalnan ku mas hende tin miedu di
dje. Kisas pasobra pelíkulanan a laga nos kere ku tribon ta diabóliko i ku
por kaba ku kualke ser humano ku ta den su teritorio.
Ta bèrdat ku nan ta animalnan feros pero nan fuente di alimentashon
no ta bin debi na atakenan kontra e ser humano. Ademas no tur tribon ta
meskos. Den e mas di 300 tipo di tribon ku ta biba den laman, ta eksistí
algun mas feros ku otro i komportashon masha diferente.
Nos ke menshoná aki algun di e tribonnan mas grandi na mundu, ku
por sierto ta tres so tin. E promé ta e tribon blanku, e di dos e peregrino i
e di tres e tribon bayena.
E tribon blanku;
Su nòmber sientífiko ta Carcharodon carcharias i ta un habitante
natural di tur awa riba e planeta aki. E por yega un grandura di te asta 6
meter i pisa mas di 2300 kilo. E ta un bon landadó i por bai di mas di 25
kilometer pa ora. Su kurpa ta blanku i shinishi loke ta pone ku e por skonde
fásilmente den e sistema eko marino. Su boka tin 300 djente. Durante di e
atake e por pèrdè algun djente, pero esakinan ta nase bek.
E tribon blanku por detektá un gota di sanger den 100 liter di
awa i inkluso detektá kantidat chikí di sanger na mas di 5 mia di
distansia esta kasi 8 kilometer leu. Ora e ta chikí e ta kome piska
i ora e krese e ta kome mamiferonan marino manera leon di awa
i olefante marino.
Kosta di California ta un luga ideal pa e tribon blanku
biba debí na su founa, profundidat i temperatura di
awa. California tabata esenario di kantidat di atake di
tribon kontra di hende debí na e aktividat deportivo di
awa i tambe turistanan na su playanan.
Remarkabel ta ku e tribon blanku ta kore peliger di ekstinshon
i p’esei for di 1992 e ta riba e lista protehá di California.
Tribon peregrino
Su nòmber sientífiko ta Cetorhinus maximus i e ta e di dos
tribon di mas grandi na mundu. E ta biba voral den laman serka
di reino Uni. E por midi te asta 12 meter grandi i pisa 3 ton i
mei. Apesar di su tamaño impreshonante, e tribon peregrino ta
kompletamente inofensivo ya ku e ta alimentá su mes di plankton
i otro organismonan manera bichi i webu di piska
E boka ta rondó i tin mas di 100 djente. E tribon aki por
yega mas serka di kosta ora ta hasi kalor manera den zomer. Ta
animalnan ku asta ta keda usa pa práktika deporte akuatiko den
nan teritorio.
A yega di haña vários di e tribonnan aki herida debi na jet
sky i otro tipo di embarkashon, ademas nan ta kore peliger di
ekstinshon i International Union for Conservation of Nature a
deklará nan animalnan protehá.
Tribon bayena
Su nòmber sientífiko ta Rhincodon i e ta e tribon mas grandi na
mundu. Por bira te asta 10 meter i por bisa 18.5 ton. E parse mas
un bayena ku un tribon i e ta un espesie di sanger frieu.
E tin kabes plat i su kolo ta shinishi ku manchanan blanku. E
tin dos manera ala patras di su kurpa.
E tribon bayena no ta un depredado, e ta lanta ku su boka habri
i asina e ta kaptura piska nan chikí i plankton.
E tribon aki ta preferá awa kayente i ta hañ’é mas den oséano
indiko voral Oustralia kaminda e bai haña yu ya ku einan tin hopi
plankton.