Page 33 - HOSPITAAL

Durante un entrevista cu Sra. Annelot Muijres, kende ta presidente di Fundacion Pro
Lechi Mama y Sra. Caroll Kock, tesorero di e fundacion, nan a elabora riba e fundacion,
nan proyectonan y con mama y famianan por acerca nan pa mas informacion y cualkier
necesidad cu nan por tin, relaciona cu lactancia materno, pasobra aunke esaki ta algo

natural y hopi saludable, tanto pa e mama como e baby, tin biaha e no ta bay dimes.
Hopi biaha mamanan mester di un sosten di un profesional y nan ta ofrece ayudo di
tres profesional.

Nan tambe ta yuda mamanan cu despues di nan verlof, mester bay traha, pero kier
sigui duna nan baby pecho, door di duna nan conseho con pa combina e trabao cu
dunamento di pecho, segun ley cu ta duna mamanan e derecho pa interumpi trabao pa
nan por duna pecho of pomp.

Ta hopi importante pa comunidad concientiza riba beneficio y importancia di lactancia
materno y pa gobierno traha riba leynan pa yuda e mamanan haya e mihor posibilidad
pa stimula dunamento di pecho.

Dunamento di pecho na Aruba mester wordo considera como algo normal, y no tin un
stigma of ta algo negativo pa e mama. Si e mama dicidi di duna pecho, e mester haya
tur apoyo y ayudo pa haci esaki, pasobra esaki tin biaha no ta facil.

Sra. Muijres a bisa cu nan ta yuda tur hende muher, kiermen legal y ilegal, kiermen
nan no ta discrimina. E ultimo registro di cantidad di mama cu ta duna pecho, compara
cu babynan cu ta haya boter, tabata na 2010, y pa aña 2019 nan lo cuminsa nan

mesun investigacion pa yega na cifranan aki. El a indica si, cu resultadonan di 2010
tabata hopi abao, y cu e investigacion nobo, nan ta spera cu e cifranan por ta mas
halto.

E nivelnan abao di lactancia materno por ta relaciona cu e falta di profesionalnan den
ramo di aki, actualmente tin dos profesional riba e isla. Y tambe hopi hende muher
mester bay traha bek hopi mas liher, compara cu otro paisnan, y e combinacion di
pomp y duna pecho ta bira hopi dificil y un stress pa e mama. Fundacion Pro Lechi

Mama ta haci tur nan esfuerzo pa yuda y intermedia entre e mama y nan trabao, pa
esaki bay mas facil posible.

-Beneficionan di lactancia materno-