Page 49 - JUS DEC 8

Locutor mas popular di Power FM deteni pa inmoralidad

Wednesday, 07 December 2016 18:11
Comparti

Ministerio Publico a confirma cu recherchenan di Jeugd en Zeden Politie a detene DJ Oz, esta Ostrick
Jansen, sospecha di a tene relacion sexual cu un mucha muhe menor di edad. Di acuerdo cu e denuncia,
el a tene relacion sexual cu un mucha muhe di 14 aña di edad.

Ta considera DJ Oz como un di e locutornan cu mas fama na e radio emisora nobo Power FM y na mas di
un ocasion e sa fungi tambe como Maestro di Ceremonia y tambe como entertainer den fiestanan.
Mayoria di su amigonan no por kere algo asina aki di dje y ta pensa cu mester ta un mal
comprendemento. Oz ta un persona masha conoci y tin un sentido di humor grandi y ta un persona
agradabel pa papia cune y pa ta den su compania.
Fuentenan Policial a indica cu casonan di inmoralidad (zeden zaak) asina ta rekeri un keho oficial
entrega na Polis si e victima ta entre 12 pa 15 aña di edad. Si ta bou di 12 aña e ora no mester keho,
pasobra Polisnan tin e poder pa actua cu ley nan tras. Den e caso aki Ministerio Publico a opta pa no bay
den detaye pa asina no haci e dolor mas grandi pa e victima.
Esunnan yega na e sospechoso a conta cu el a conoce mucha muhe den un club nocturno, di cual e
victima tabata consumiendo alcohol, humando cigaria y tabata den compania di su mayornan. Di eynan a
start un relacion amoroso y el a admiti di a tene relacion cu e mucha muhe. Ta despues el a haya sa di su
edad y a stop mesora, mustrando asina cu no ta normal cu e ta mantene relacion amoroso cu menornan
di edad. Asina mes, e victima a keh'e na autoridadnan policial cu consecuencia cu a base di ley, tene
relacion cu un mucha muhe bou 16 aña di edad, sea ta consenti of no, ta keda un acto castigabel.
Abogado mr. Chris Lejuez ta defende e locutor den e caso penal aki cu apenas a inicia. Ta den fase di
interogacion ainda y e abogado ta sigur cu su cliente ta sinti masha malo pa locual a sosode. Actualmente
DJ Oz ta sera na warda di Noord