Page 32 - THUKUL JADI_Neat

Thukul ing Lemah Nela

Sapa sing wis tumindak kaya ngono. Photo-photone
ngrenggani kaca ing layang kabar.
Geger neng kutha. Kanciludin mung mesem
krungu kojahe Trucuk lan Walang ing warunge Yu
Bethet. Jarene iki mesthi ana sing nyilih nabok tangan,
iki mesthi pokal gawene musuh politike.
“Bener, Cuk. Bisa uga iku musuh ing sajroning
slimut. Mokal ora ana sing ngerteni kedadean iku,”
kandhane Walang karo ngudheg kopi. Karo nyruput
kopi Kanciludin ethok-ethok ora weruh yen ana
prastawa gedhe saka pokal gawene.
Rembug larane anake penggedhe kutha, saya dina
saya rame. Kathik kari telung sasi wancine pilihan
penggedhe lan wakile kanggo wektu limang taun
engkas. Para botoh lan tim sukses wis siyaga njajah
desa milangkori. Mesthi wae kahanan rada panas.
Esuk awan sore rame polahe wong-wong padha
nggawa lan masang umbul-umbul. Dadi kahanan kiwa
tengen dalan dadi kebak karo anane umbul-umbul sing
dipasang. Dina-dina iki usum wong-wong padha oyak-
oyakan rebut bener ngoyok srengene lan rembulan.
Kanciludin buneg nyawang kabehe kuwi. Dheweke
luwih becik mikir kanggo isine dandang supaya bola-
bali ora mung trima mangan sega wadhang.
Rembug ing warung meneng sedhela, awit
ketungka tekane Jago Wido. Bubar pesen kopi,
dheweke ngoceh ngenani apike calon penggedhe sing
karan incumbent kuwi. Kanciludin uga ora nggape
tekane Jago Wido kuwi. Awit dheweke wis kadhung
anyel marang sakabehe iku. Pas ana butuh kaya ngana
kae, blusukan rana-rana, wong-wong cilik diparani
disungkemi. Nanging bareng wis kelakon lelana teki-
teki lali sangkan, lungguh ndhegleg kursi mendut-

Supriyoko | 24