Page 34 - EXTRA

36 Djabièrnè 19 Yanüari 2018
Hues a redusí

but despues
ku shofùr a

proba ku

dokumentonan
ta pagá

WILLEMSTAD.- E
hòmber L.P. ta un di e
tantísimo shofùrnan ku
a akudí dilanti korte, pa
reklamá un but ku e no
ta di akuerdo kuné.E ta
keda akusá di a kometé
infrakshon den tráfiko
na novèmber último. Pa
motibu di esaki polisnan a
par’é i dun’é un but.
Segun e prosèsverbal, e
akusado no tabatin su faha
di seguridat bistí i tampoko
no tabata disponé di un
seguro bálido.
Komo si fuera esaki no
ta basta, e verbalisante a
relatá di a tuma nota ku e
shofùr maskulino su papel
di kùr tampoko no tabata
na òrdu.
Anteriormente e kaso a
keda posponé pa motibu ku
e shofùr a bisa di por proba
ku dia polis a dun’é e but,
tur su kosnan tabata pagá.
P’esei el a akudí na korte
pa proba esaki.
Segun e shofùr, e
problema tabata ku e no
tabatin e dokumentonan
den su poseshon na e
momento ei serka dje.
El a splika korte ku
tabata pa motibu ku un dia
promé e vehíkulo mester a
bai kùr i a kaba di tum’é na
garashi.
E shofùr a bolbe regresá
korte bèk i a trese tur su
dokumentonan pa hues por
tira un bista.
El a proba ku en bèrdat
su kosnan tabata pagá na
momento ku polis a par’é.
Fiskal a hasi un
demanda di 300 florin di
but en total pa e shofùr aki,
mirando tur e papelnan ku
no tabata na òrdu. Kada un
dokumento tin su preis di
but.
Hues ku mester a
tuma un desishon, a tene
konsiderashon i ta desviá
for di e demanda di fiskal.
Hues a bisa ku e shofùr
a proba ku tur kos tabata
pagá, pero e no tabatin e
papelnan huntu kuné.

Pa ku esaki hues a bisa di
ta kondená e shofùr na un
but di 50 florin pa motibu
ku e no tabata disponé
di su dokumentonan na
momento ku polis a par’é.