Page 93 - testmergebrochureV0604

gewëssen Charisma mat sech bréngen. Un éischter Stell fungéieren
do sécherlech de President an den Dirigent. Hei kënne, jee no
Charakter, fantastesch Zesummenaarbechten entstoen, mee jee no
Charakter besteet hei och ee grousse Konfliktpotential. A ganz oft
fënnt een an de Geschichten vun deene verschiddenen Museken,
datt no engem charismateschen President, den wousst wéi een déi
néideg Fërderung lokal oder national fir de Veräin ka kréien, oder no
engem Dirigent dee Museker mat neie Stécker aus der Reserve ze
brénge wousst, dës Musek an ee Lach ka falen, wéi wann et hinnen
géif un enger Stäip feelen. An esou definéieren sech haut nach
Museken iwwert hire President oder hiren Dirigent. Rezent Beispill
ass am Ament déi Dikrecher Musek, wou den Erny Hammes 2016 de
Posten vum Dirigent iwwerholl huet. Mir wäerte gespaant kucken
wou déi Musek an deene nächste Joren wäert higoen.

3. Aufgaben an Erausfuerderungen vun de Museken haut

Am Virwuert vum Buch zum 150 Gebuertsdag vun der Philharmonie
Grand-Ducale et Municipale Ettelbréck geet d’ Madame Erna
Hennicot-Schoepges op d’ Jugendaarbecht an, déi vun der
Philharmonie gemaach gëtt. Eng Fanfare, eng Philharmonie ass net
nëmmen eng zesummegewierfelt Band vu Leit di sech treffen fir
Musek ze maachen a fir vun Zäit zu Zäit ee Concert ze organiséieren
oder un engem Concours deelzehuelen. Hei gëtt ganz vill Aarbecht
am Jugendberäich gemaach. D’ Harmonie iwwerhëlt d’ Roll vum
Educateur, an dat net nëmmen wat d’ Instrument ugeet, hei ginn
och Valeuren vermëttelt: Frëndschaft, Verantwortung an Toleranz.
Ouni dës Valeuren kann eng Musek net funktionéieren.

A wat wier Duerf- a Gemengeliewen haut ouni Musek? Si si präsent
op all Kiermes, Fest, zum Deel esouguer Hochzäiten,
Nationalfeierdag oder soss Feierlechkeeten déi et musikalesch ze
encadréiere gëllt.Um Beispill vun der Escher Harmonie Muncipale
kann een gesinn wéi hier Aktivitéit am Joer 2012 ausgesinn huet: 9
Concerten, 11 Cortègen begleet, 98 Prouwen, 7 Hämmelsmärsch!