Page 127 - TH Edition Ver3
P. 127
DNII
Suttantapiṭake
Dīghanikāyo
(Dutiyo bhāgo)
Mahāvaggo
Namo tassa bhagavato arahato sammā sambuddhassa.
Mahāpadānasuttaṃ
Evaṃ me sutaṃ: ekaṃ samayaṃ bhagavā sāvatthiyaṃ viharati jetavane
anāthapiṇḍikassa ārāme karerikuṭikāyaṃ. Atha kho sambahulānaṃ
bhikkhūnaṃ pacchābhattaṃ piṇḍapātapaṭikkantānaṃ karerimaṇḍalamāḷe
sannisinnānaṃ sannipatinānaṃ pubbenivāsapaṭisaṃyuttā dhammī kathā
udapādi: 'itipi pubbe nivāso, itipi1 pubbe nivāso'ti.Assosi kho bhagavā
dibbāya sotadhātuyā visuddhāya atikkantamānusikāya tesaṃ bhikkhūnaṃ
imaṃ kathāsallāpaṃ. Atha kho bhagavā uṭṭhāyāsanā yena
karerimaṇḍalamāḷo tenupasaṅkami, upasaṅkamitvā paññatte āsane nisīdi.
Nisajja kho bhagavā bhikkhū āmantesi: "kāyanu'ttha bhikkhave etarahi
kathāya sannisinnā? Kā ca pana vo antarā kathā vippakatā?"Ti.
Evaṃ vutte te bhikkhū bhagavantaṃ etadavocuṃ: "idha bhante amhākaṃ
pacchābhattaṃ piṇḍapātapaṭikkantānaṃ karerimaṇḍalamāḷe
sannisinnānaṃ sannipatitānaṃ pubbenivāsapaṭisaṃyuttā dhammī kathā
udapādi: 'itipi pubbenivāso, itipi pubbenivāso'ti. Ayaṃ kho no bhante
antarā kathā vippakathā. Atha bhagavā anuppatto"ti.
"Etassa bhagavā kālo, etasusa sugata kālo, yaṃ bhagavā
pubbenivāsapaṭisaṃyuttaṃ dhammiṃ kathaṃ kareyya. Bhagavato sutvā
bhikkhu dhāressantī"ti. "Tena hi bhikkhave suṇātha, sādhukaṃ
manasikarotha, bhāsissāmī"ti. "Evambhante"ti kho te bhikkhu bhagavato
paccassosuṃ, bhagavā etadavoca:
