Page 28 - E-Modul Pendidikan Bahasa Bali SD

5.4 Warna Basa Manut Gaya
Parinama warna basa manut gaya puniki prasida kasandingang ring
parinama parilaksana panutur. Gaya utawi abah anake mabasa kawesanain
antuk anake sane kasarengin mabebaosan miwah widang sane kabaosang
taler tetujonnyane. Antuk pawesana bebaosan sakadi sapunika, wenten gaya
resmi (formal) utawi santai (relax), kawewehin antuk gaya kaku, adab, hangat,
dingin, akrab, miwah sane lianan. Gaya basa sane resmi punika karasayang
kaku nanging singgih, miwah tan parasa.Yening gaya basa sane santai punika
karasayang tampek, raket, anget, nanging prasida kemanten karasayang
dingin.
Mapaiketan ring gaya basa, Joss sajeroning Jendra (1991:56) ngepah
gaya basa dados lima:
a) Beku (frozen style) inggih puniki warna basa sane pinih resmi. Punika
sane ngawinang gaya basanyane kekeh miwah tan dados obah.
Kawentenan bebaosane dahat resmi, imbanyane sajeroning upacara
bendera makelingin Kemerdekaan RI, pangwacenan prasasti,
pangwacenan awig-awig, miwah pangwacenan keputusan ring
pengadilan. Ring sor puniki kaicen imba gaya basa beku sajeroning
prasasti sane mabasa Bali Kuno (Prasasti Batunja A1).
b) Resmi (Formal) inggih punika warna basa sane sering kaanggen
ring paruman-paruman, loka sabha, sambrama wacana, miwah
patemuan-patemuan sane kaiket antuk kawentenan sane kabaos
resmi. Sajeroning basa sesuratan minakadi: warna basa sajeroning
sewala patra kedinasan miwah lapuan tetilikan mamidya. Ring sor
puniki kaicen imba sewala patra saking Dinas Pendidikan Kabupaten
Buleleng.

c) Usaha (consultative) warna basa sane kaanggen nenten sakadi basa
resmi,
prasida kapanggihin ring sekolah-sekolah miwah rapat-rapat usaha.
Kruna-kruna sane kaanggen macampuh pantara kruna alus singgih,
alus madya, alos sor, miwah kapara. Ring sor puniki kaicen imba
bebaosan guru sareng sisya ri kala pamlajahan Basa Bali ring kelas.
d) Santai (casual) warna basa puniki sering kapanggihin ring penggak,
genah-genah malila cita, bioskop, miwah sane lianan.
e) e. Akrab (intimate) paiketan sane raket pisan sinah ngamedalang
warna basa sane matiosan. Minakadi pasawitran sane sampun sue
turmaning raket pisan, sirep bareng, ngajeng bareng, miwah sering
sinarengan sajeroning kauripan sarahina- rahina. Ceciren ring
sajeroning warna basa puniki minakadi, lengkaranyane ringkes,
wewehan sane kaanggen mabinayan ring wewehan ring basa resmi.
Ring sor puniki kaicen imba bebaosan ring sawitra sane raket.

25