Page 41 - TTC MAY 26

Gobierno ta para 100% tras di e proyecto di Bahia Principe
na San Nicolas

Publication: Tuesday, 26 May 2015. Categoria: General

Minister Otmar Oduber

ORANJESTAD (AAN): Minister Otmar Oduber a tuma nota cu siman pasa e e corant di
Weststraat a publica un editorial riba e topico di All Inclusive cu ta mustra cu e tendencia aki ta
hopi peligroso pa nos isla y cu un Bahia Principe na San Nicolas lo por trece su impactonan
negativo.

Riba e tema aki e mandatario a bisa cu e por compronde e preocupacion, pero na mes momento
ta puntra su mes ta ki efecto negativo e lo por tin pa e area di San Nicolas. Al contrario, e ta
considera cu pa por crea e volumen di personanan pa bay pariba di nos isla combina cu esunnan
cu por traha den e area ta importante pa bin cu un proyecto asina.

Minister Oduber a pone enfasis cu e Gobierno aki ta para 100% tras di e proyecto di Bahia
Principe pa por crea empleo den e area, cual ta encera entre 500 pa 600 hende cu ta biba den e
area y lo keda den e area tambe. E consecuencia di esaki ta cu nan lo cumpra nan cosnan pariba
reforzando asina economia di pariba, mientras cu nan lo tin mas tempo pa nan famia.

Banda di esaki mester tin car rentals pa duna servicio, mester transporte publico unda cu taxinan
tin cu bay pariba, souvernir shopnan, etc.

Minister Otmar Oduber a mustra tambe riba e hecho cu a prepara un plan a corto, medio y largo
plazo caminda cu ta sigura cu ta crea fluho y desaroyo economico-comercial na mes momento.
Basa riba estudio di ATA, ta calcula cu rond di 30 mil persona lo por bishita e area di San
Nicolas, sea cu nan ta kedando den e hotel pariba, sea cu nan ta bin riba crucero of ta kedando na
nos isla.

Tambe e mandatario a indica cu no lo haya ningun hotel cu lo ubica su mes den un area manera
esun actual na San Nicolas. Bahia Principe ta conoci pa e forma strategico cu nan tin pa bay den
areanan cu a hacie atractivo pa Aruba sinta na mesa cu nan mirando e calidad di proyectonan cu
nan ta pone denlugarnan cu tin un falta di desaroyo.