Page 66 - flip min.on

Dia mi wordo prohibi pa laga investiga un keho di un mucha
ta e ultimo dia cu mi lo ta Minister

Publication: Tuesday, 31 March 2015. Categoria: General
Minister Michelle Hooyboer – Winklaar

ORANJESTAD (AAN): “Tur keho cu drenta relaciona cu trato di un mucha of cualkier keho cu
por afecta un mucha, ta wordo atendi dor di departamentonan responsabel, manera a sosode den
e caso aki” asina Minister Michelle Hooyboer-Winklaar a duna di conoce durante e conferencia
di Prensa yama pa splica encuanto di e acontecimentonan rond di Scol Primario Kudawecha.
Hunto cu Minister Michelle Hooyboer-Winklaar a hiba palabra John Hessen, Inspecteur
Generaal der Onderwijs cu tin como tarea pa hiba un inspeccion profundo y analisa tur e
cartanan cu a yega cerca dje y evalua e caso y pasa su rapport pa Minister di Enseñansa.
“Mirando e seriedad di e problema y mirando e tension cu tin den e caso aki pa tur esunnan
envolvi e directiva di scolnan basico, Dienst Publieke Scholen (DPS) cu ta resorta directamente
bou di Ministerio di Enseñansa, a actua legalmente y moralmente riba base di e keho y a sigui
segun reglanan di LMA. A scucha tur partido envolvi, esta e maestro, e hoofd di scol, e
mayornan y e mucha mes.
E conversacion cu e juffrouw di scol a tuma luga 5 di Maart y ta dia 20 di Maart a manda carta
pa e maestro di e klas concerni riba medidanan tuma, pues sigur esaki no tabata un dia pa otro
manera algun noticia eroneo ta menciona. Mi persona a ricibi un conseho for di e Directeur di
DPS, despues di nan investigacion preliminario, y riba esaki ami a duna aprobacion pa lo
siguiente: 5 dia non-actief cu pago (esta lo continua cobra salario e 5 dia nan ey); lo ruleer e
maestra en cuestion y ta pone un otro maestro den su klas, mientras e lo bay den un otro funcion
na e mesun scol, lo busca begeleiding pa e docente, y lo continua cu investigacion.
Tur esaki lo a drenta na vigor despues di e periodo stipula legalmente di 7 dia pa entrega un
bezwaar y durante cual e maestro por defende su mes.