Page 77 - MIN.VOS ALEX MAY 8

Impacto di siguridad den trafico riba bo salud

Publication: Friday, 8 May 2015. Categoria: General

Siman di Siguridad den Trafico di Nacionnan Uni: 4-10 di mei

ORANJESTAD (AAN): Siguridad den
trafico mester ta tur dia na prome luga, pa motibo cu ora un accident sosode e por tin un impacto
fuerte riba bo salud fisico y/of mental. Si tuma e parti di impacto fisico bo por haya sla na bo
curpa den forma di golpi blauw of rasca. Tambe internamente bo por haya sla por ehempel kibra
weso of sangramento interno.

Durante e Siman di Siguridad den Trafico di Nacionnan Uni ta wordo enfoka riba mucha,
Departamento di Salud Publico kier conscientisa comunidad riba e importancia di mantene
siguridad den trafico y riba e consecuencianan cu accidente di trafico por tin riba nivel
individual, familiar y pa comunidad henter.

Ora un accident di trafico ta fatal ta papia di perdida pa e famia, pero tambe e ta un perdida pa
comunidad. For di aña 2010 a keda calcula cu e expectativa di bida na Aruba pa hende muhe ta
79.8 aña y pa hende homber 73.9 aña.

Na momento cu un persona perde su bida prematuro debi na un accident di trafico ta papia di
añanan potencial di bida di e persona aki cu a bay perdi. Esaki ta nifica tambe cu comunidad ta
perde e añanan di productividad di e persona aki. Perdida di un bida no tin un impacto solamente
riba e proceso laboral, pero tambe riba e famia cu ta keda sin yiu, tata of ruman.

Na Aruba e causa nr #1 di morto prematuro cerca hobennan ta accident trafico. Mensahe di
Departamento di Salud Publico ta pa core consciente y cu cuidou. No trece bo bida den peliger,
tampoco di bo famia y ni di otro persona cu tambe ta haci uzo di trafico. Controla velocidad, no
bebe of text ora bo ta stuur. Chauffeur hoben bo tin bo bida bo dilanti, uza faha di siguridad y
helm si bo ta core brommer.

Conseho pa mayornan pa pone baby y muchanan corectamente den un childseat, supervisa
muchanan na tur momento y siña nan e reglanan di trafico.

Pa mas informacion por tuma contacto cu Departamento di Salud Publico, telefon 522-4200.

http://www.diario.aw/2015/05/impacto-di-siguridad-den-trafico-riba-bo-salud/