Page 78 - MIN.VOS ALEX MAY 8

Islanan den Caribe Hulandes uni den Salubridad Publico

Publication: Friday, 8 May 2015. Categoria: General

Preparando pa Health Conference na Aruba

ORANJESTAD (AAN): Durante di su bishita recientemente na Curaçao pa papia cu
profesionalnan medico y autoridadnan di diferente instancia cu ta traha den cuido medico tocante
Health Care Conference Aruba (HCCA), Minister dr. Alex Schwengle a reuni tambe cu Director
medico di SEHOS, dr. Carlos “Cay” Winkel.

HCCA ta “un iniciativa sumamente importante pa nos tur, pasobra mi ta completamente di
acuerdo cu e idea di Minister Schwengle, cu aunke nos ta islanan apart, nos mester traha hunto,
nos mester uni,” dr. Winkel a subraya. El a añadi cu islanan chikito por bira grandi door di uni y
yuda otro, cual hustamente ta tambe e meta di e conferencia.

Minister Schwengle a presenta e programa na tur e islanan Hulandes Caribense y a invita e
instancianan, como tambe profesionalnan medico cu ta traha pa e instancianan manera clinicanan
y hospitalnan, pero tambe dokternan di cas y Banco di Seguro Social (SVb) na Sint Maarten y
Curacao pa participa.

Dr. Winkel a bisa cu e ta sumamente contento cu e conferencia ta worde organiza y cu e ta su
intencion pa participa activamente. El a splica cu tin masha hopi specialista medico hoben ta bin
traha na e hospital di Curaçao y ta notabel cu tin un diferencia grandi entre con e specialistanan
medico ta worde educa y ta traha awendia compara cu tempo cu el a studia y cuminsa traha y tin
hopi cambio den organizacionnan mes tambe.

E hospital di Curaçao ta un opleidingsziekenhuis cu ta ricibi studiantenan como assistenten y co-
assistenten tambe, unda cu por nota e diferencia entre e “antes” y “awo” y e cambionan cu ta
sigui tuma luga. E organizacion ta mas fuerte; e calidad di cuido pa e pashent ta un factor
sumamente positivo.
Desaroyonan den ciencia medico ta demostra cu tecnicanan y tecnología di intervencion ta mas
compleho y pa mantne calidad di cuido y ta competitivo ta importante pa nos traha hunto. Esaki
sigur lo aumenta nos posición den Caribe tambe como islanan cu ta updated den cuido medico.

Dr. Winkel a conclui cu e remarca cu cuido medico ta bayendo dilanti na Curaçao como tambe
na Aruba y si e paisnan bay dilanti hunto ta mas miho ainda.