Page 12 - MIN JUS

http://masnoticia.com/segun-eddy-ras-di-pdr-gobierno-indirectamente-ta-fomenta-criminalidad/

Segun Eddy Ras di PDR, Gobierno indirectamente
ta fomenta criminalidad

• Jan 14th, 2015
• Politica

Algo cu a bini ta hala atencion di e fraccion di PDR ta e hecho cu Gobierno ta crea problemanan social cu
por comberti den criminalidad. Esaki ta locual cu sr. Eddy Ras a trece dilanti durante un rueda di prensa
teni recientemente.
E diferente instancianan cu ta traha riba e tereno di problemanan social a hayanan mes den problema
pasobra Gobierno a dicidi di reduci subsidio na e instancianan aki. Tanto instancianan cu ta traha den
sector preventivo y curativo. Esaki logicamente ta haci cu e instancianan aki lo por yuda menos y duna
menos asistencia den comunidad.
E motibo di e reduccion di subsidio ta pa baha e gastonan pa Gobierno.
Otro punto cu a hala atencion di sr. Ras ta e hecho cu schoolbestuur a aumenta schoolgeld di 75 florin pa
250 florin. Aki tambe a uza e argumento cu e subsidio cu Gobierno ta duna no ta alcansa pa hiba e scol
na e nivel mas halto. Otro punto cu schoolbestuur a trece dilanti pa splica e aumento ta hortamento di
tubo di koper na scolnan, mantencion cu a aumenta y limpiesa na e scolnan tambe a bira mas caro.
No ta pa un schoolbestuur tur cos a bira mas caro pero pa tur otro schoolbestuur tambe.
Sr. Ras a bisa cu lo no mester ta un sorpresa cu den futuro mas schoolbestuur bay aumenta schoolgeld.
Mas aleu sr. Ras a trece dilanti cu si bo corta den subsidio pa instancianan social, e problemanan social
ta bay aumenta. Na momento cu problemanan social aumenta esaki lo haci su entrada na scolnan y
eventualmente bo ta bay hañabo cu hopi hende na Aruba cu no tin enseñansa suficiente. Tur esaki lo tin
efecto hopi negativo riba nos structura.
E medidanan cu ya a keda introduci y esunnan cu ainda mester keda introduci, no ta haci solamente
costo di bida mas caro, pero tambe e necesidadnan cu mayornan mester cumpli cu ne pa nan yunan bay
scol no por tuma luga mas. Entro otro uniform di scol, tas, material di scol etc. lo no por wordo cumpra
mas. Enseñansa ta bay bira demasiado caro.
Gobierno mes ta crea a structura cu aki un par di aña bo ta hayabo cu hendenan cu no tin un educacion
of no tin un educacion suficiente tur lo ta bay gana un sueldo minimo.
Criminalidad lo bay aumenta na momento cu e mayor no por paga mas pa su yiu bay scol y esaki
cuminsa bay den e mal caminda.
Recientemente Gobierno a anuncia e comienso di diferente proyecto PPP. Entre nan e proyecto di green
corridor balora na 100 miyon dollar. Di un banda Gobierno ta introduci diferente medida anto di otro
banda ta bini cu un proyecto asina costoso.
Finalmente sr. Ras a trece dilanti cu den futuro nos lo no por bisa mas cu criminalidad a crece na Aruba,
sino mas bien cu Gobierno indirectamente a fomenta criminalidad.