Page 6 - Artemis_ Nr.7 (Juni 2021)

Christian FALTL

D' Marie

I sitz' im Beisel in da Eck'n
und vua mia glei' - so wisawi -
do sitzt dea Kerl, direkt zum Schreck'n
und woat auf de Marie.

O'gspannt hob i des gaunze scho'
vua ziaka vierzehn Tog,
zuagwoat hob i bis heute no',
bevua i a' wos sog.

D’ Marie und i, mia woan beinaund
scho' seit an hoibn Joa.
Zwa Monat bin i jetzt am Saund
weul i net liefern foa.

D’ Marie geht nahn, seit Joa und Tog
zum Schnepf, an Kuturjeh.
A Mensch, den i net leid'n mog,
weng' seine Greißler-Schmäh.

„Küß d’ Hand, gnä Frau, fesch samma heut ...“
und soiche fade Tanz,
do hots hoit g’seng de besser'n Leut,
besonders den Herrn Franz.

An Ob'nd - viazehn Tog is hea -
sogt’s gaach, sie muaß zum Schnepf.
Es woa scho' ochte oda mea,
weng' g’stickte Mantelknepf.

A do schaust hea, hob i ma g’sogt,
des kummt ma komisch vua.
Hob dann mein oidn Mantel pockt
und woa fuat bis in da Frua.