Page 11 - Artemis_ Nr.7 (Juni 2021)

Deïs woar ‘s .....! A kua(r)za Nochruf! (Zeitungsversion ©Franz GEISSLER)

Oa Woucha is deïs schou wieda her,
dass da „Bundesrudl“ is koa Minista mehr,

weul er houd deïn Stress nimma dapackt
- gsundheitlich houd s eahm niedaprackt -

und er wuitad si ah oan Hauffa Ärga dasporn
und si neamma treibm loussn voun deï vüln Norrn,
deï imma niar ollas kritisiern und beïssa wissn,

d Leid aufhussn und poustn ouhni irgandoan Gewissn!
Dabei woar grod er der, der mid seina ruhichn Oart,

uns deïn oan oda aundarn Bledsinn voun deï Regiearungspartna houd daspoart.
Ollas houd a owa ah nid voun uns oweïndn kinna
einpfercht zwischn „Massetsch-controulltn“ drinna,

deïna niar eahna Image wichtich woar
und deï nan eïftas aunreïnna hobm loussn sougoar.

Deï hobm näimlich hauptsächlich af eahna Klientel gschaut
und eahm - guid tarnt und vasteïckt - s Hackl hintn einighaut.
Deïs ollas houd a eh ertrogn mid oana Eïnglsgeduid,

waunn wos schiefgaunga is und seï af eahm zoagt hobm: „Er is schuid!“
Oubwuhl a söwa vüles beïssa gwisst houd,

houd a daunn douch frustriert gfreïssn deï Groud
und si aus Disziplin beigt in Koalitiounszwaung,
ah waunn s eahm nouchha wurn is aungst und baung.

Er hädad ah vül lieawa deïna Expertn vatraut,
stott wia da Kaunzla niar af d‘ Umfrogewerte gschaut.

In da Regierung woar a ah a weïngl isouliert
und houd in Druck voun olli Seitn ziemli gspiart,

oubwuhl grod er, dea ruhich und mid Besounnanheid
Z‘saummanhäinge erklärn houd kinna mid vül Empathie fiar d‘ Leid.

Vastehts mi nid foisch: parteipolitisch hon ih mid eahm nix am Huid,
owa rein sochlich woar a in dera Zeid fiar unsa Laund schou guid.
Bleibt niar zan houffa, dass der neichi Gsundheitsmaunn

si geïgn Porteitaktik und Populismus durchseïtzn kaunn.
Deïs Virus is nau laung nid besiegt, si wird uns laung nau quöln

und, werd s sehgn, oana wia da Anschoba Rudi wird uns dabei sicha nau föhln!