Page 9 - Artemis_ Nr.7 (Juni 2021)

Chris: Die Himmüfoah(r)t (Zeitungsversion ©Franz GEISSLER)

Da Chris, der houd a Leidnschoft,

und deï leïbt a aus mid vulla Kroft:
näimlich midn Bike durch d Geïgnd zan rauschn,
deïs mechat a mid guar nix aundaschts tauschn!
Waunn s Weïda passt haut a si in d Leïdakluft,

dou hoit eahm nix mehr, weul „die Straße ruft“!
Iwa sei Maschin lousst a nix kumma,
„MA-BIKE 1“ is af da Bleïchtofü sei Numma.
Schoun in da Schui houd s eahm bsundas intressiert,
waunn wos hin woar, wia ma s wieda repariert.

Er woar koa Spurtla nid, houd nia grauft,
soundarn lieawa ba sein Foahrradl umanaundagschrauft.
Späida houd a daunn sei Moped frisierd

und dauand putzt und s Chroum polierd.
Fiar eahm is nia oa Beruf in Froge kumma:
Mechanika fiar leichti und fiar schwari Brumma!
Nouch da Leahr houd a daunn nau in Masta gmocht
und es sogua zu oana eignan Werkstott brocht.

D Leid’nschoft fiar Motore hobm ah seini Kundn gspird
und eahm zu oan gewissn Wuhlstaund gfihrd.
Sei Berufswohl houd a nia bereid,

s Gschäft reïnnt voun alloan, er houd recht guidi Leid.
Söwa oawadn braucht a oisan neamma vül
und sou kaunn a keïmma und geïhn waunn a wül.
Und waunn s eahm gluscht oamul in da Fruah
und er deïnkt si: „heind moch ih a Tour“,

weul a-r-an Draung nouch Freiheid gspird,
daunn wird deï Harley präparierd.
Fir n Chris is deïs Biken da beïste Spurt!
Er is richtich glicklich, waunn da Motor schnurrt.

Recht zügig ziagt a iwa n Wechsl-Poss,
dou wirst d schoun ban Zuischaun bloss.
Aun irgandwöche Gfoahrn houd a nia deïnkt,
waunn a sei Harley CVO Road King houd gleïnkt.

Deïs is eahm deïsmui zan Vahäingnis wurn,
weul a houd d Kontrolle iwa sei Maschin valurn.
A greßas Astl af da Stroß houd a iwasehgn!
Er houd d Maschin varissn und schoun woar s gschehgn!