Page 45 - MODUL 1

madu, temulawak, kacang ijo, iwak laut, iwak darat, lan sapiturute. Amarga seliyane
khasiat kang kakandhut ing panganan tradhisional Indonesia, ana segi positip liyane
yakuwi: bahan-bahan kang alami, gizine akeh, sehat lan aman, murah, lan gampang
ditemokake jumbuh karo selera masarakat. Saengga, duweni potensi kanggo dadi
panganan tradhisional.

IV. TEKS DESKRIPSI PANGANAN TRADHISIONAL JAWA
A. Kuliner khas Cilacap
1. Mendoan

Mendoan yaiku panganan kang digawe saka tempe sing dilapisi
adonan tepung terigu utawa gandum banjur digoreng. Tempe mendoan iki
beda karo tempe Mendoan ing dhaerah liyane, amarga nduweni cita rasa
kang khas. Jeneng mendoan asale saka tembung “mendho”, kang tegese
“setengah mateng” utawa “durung atos”. Jumbuh karo jenenge, tempe
mendoan iki nduweni ciri khas tekstur kang lemes utawa lembek amarga
digoreng setengah mateng. Beda karo tempe ing dhaerah liyane kang
akeh-akehe digoreng nganti garing. Kejaba iku, ciri khas saka tempe
mendoan iki yakuwi minyake sing nggawe tempe ketok klimis.
Cara nggawe mendoan yakuwi, tempe dilebokake marang adonan
tepung terigu utawa gandum sing wis dibumboni. Sawise, digoreng ing
wajan isi minyak sing wis panas. Nggoreng mendoan ora butuh wektu
suwe, mung nganti setengah mateng ora nganti garing. Saengga
nggorenge kudu cepet diangkat saka waja amarga minyak sing kanggo
nggoreng wis panas. Kajaba iku, minyak sing kanggo nggoreng mendoan
iki kudu akeh supaya tempe mendoane bisa mateng mrata. Tempe
mendoan biasane disajikake nalika tempe isih anget, amarga yen wis
adhem rasane bakal beda. Kanggo ndhahar tempe mendoan iki, bisa
ditambah lombok rawit utawane sambel kecap.

2. Krupuk Iwak Tengiri

Krupuk iwak tengiri yaiku salah sawijiing jinis krupuk kang bahan
dhasare iwak tengiri sing dicampur karo bahan liyane saengga ndadekake
rasa gurih lan enak. Krupuk iwak tengiri dadi karemenane akeh wong
amarga bisa didadekake lawuh uga bisa dadi cemilan. Krupuk iwak tengiri
iki uga menehi manfaat kanggo manungsa amarga kandungan gizine sing
apik kanggo kasarasan yakuwi kandungan omega 3 sing nduweni manfaat
kanggo njaga daya tahan tubuh, mbiyantu kerja jantung, mudunake tekanan
darah tinggi, mbiyantu kinerja otak, lsp.
Ing Cilacap, akeh produksi iwak tengiri amarga dhaerah Cilacap
sing cerak laut. Saengga gampang anggone golek iwak tengiri. Biasane,
asil laut kuwi ngandhut gizi sing akeh. Nanging, amarga ambune sing amis
arang wong sing gelem ngolah asil laut kanthi cara biasa. Pramila, digawe
krupuk iwak tengiri supaya ambu amise ilang.

45
BAHASA JAWA - SMA/MA - Kelas X Semester Genap