Page 52 - testmergebrochureV1004

Kuckt een an den Aktivitéitsberichter aus de 70 Jore bis haut da ass
et fantastesch ze gesinn wou schonns iwwerall e Concert gespillt
ginn ass. Ervirzehiewen ass hei sécher och de Waimaart zu
Meechtem wou d'Fanfare schonns zënter den 80. Joren ëmmer
wëllkoom ass fir e Concert ze spillen. Dertëschent war d'Musek
awer och bäi Kavalkaden zu Wincheringen an zu Esch. Op
Ouverturen vu groussen Entreprisen déi sech hei zu Leideleng
implementéiert hunn ass Präsenz gewise ginn, a wa sech ee vun eise
Musikante bestued huet war natierlech d'Musek dobai fir
matzefeieren.

Vun 1989 bis 1999 waren als Dirigenten déi Hären Norbert Pegel,
Norbert Valmorbida an Romain Geimer an der musikalescher
Verantwortung. Ënnert dem Romain Geimer sinn dann och d'
Festlechkeeten vum 100 Anniversaire vun der Fanfare 1993 iwwert
d'Bühn gaangen.

D'Festivitéiten déi sech iwwer Mee, Juni a Juli 1993 erstéckt hunn
haten e grousse Succès. Déi enorme Vilfalt vum Programm, de neie
Fändel, an déi nei Uniformen hu mat duerzou bäigedroen. Den
Héichpunkt war den 11 Juli 1993 mat der Aweiung vum neie Fändel,
dem Cortège deen a Form vun engem Stär an Duerf erakoum, an
dem Ofschloss Concert vun der Harmonie Municipale Luxembourg –
Eich.

Sou eng Feier bréngt ëmmer nees nei Motivatioun an e Veräin, an
sou ass sech net ausgerout ginn mee no vir gekuckt. Nei Aktivitéiten
sinn dobäi komm wéi z.b. Bedeelegung um Ëmzuch vum Kleeschen
an der Stad, Äppelfest, Playbackshows, Fréijoersconcert an de
Kiermesconcert.

1997 gett aus der «Fanfare de Leudelange» eng asbl mat dem
Numm «Leidelenger Musek», an dat wëll och aner Instrumenter
gespillt gi si wéi dat an enger Fanfare soll sinn (Blech).