Page 168 - gjuha shqipe 3 per shtyp.pdf

STINA E VERËS

Në vendin tonë, vera është një nga
katër stinët e vitit. Ajo është stina e luleve,
e frutave mjaltë të ëmbla dhe e perimeve
të freskëta. Është edhe stina e pushimeve.
Shkojmë në plazh, lahemi dhe notojmë mbi valë.

Por, pushimet verore nuk janë në të njëjtën kohë
në të gjithë botën. Kur ne bëjmë pushime verore, fëmijët
e Kilit dhe të Argjentinës luajnë me dëborë. Kur ne marrim pushimet e
dimrit dhe festojmë Vitin e Ri, në Australi është verë.

Tani dikush nga ju po mendon se sa mirë do të ishte sikur të udhëtonte
një herë në disa muaj dhe ta kalonte gjithë vitin në vendet ku ka trokitur
vera. Ose, se sa mirë do të ishte sikur stina e verës të zgjaste përgjithmonë.
E pra, ekziston një rajon i tillë. Ai është Ekuatori, rajoni që ka vetëm një

stinë: verën. Atje bën nxehtë gjatë gjithë kohës dhe bie shumë shi.

Por, ka edhe vende që nuk e kanë stinën e verës. Pranë poleve, bën
ftohtë gjatë gjithë vitit. Deti është i ngrirë dhe toka e mbuluar nga akulli.

përshtatje nga enciklopedia Stinët
Fjalë të reja

rajon – hapësirë ose vend i gjerë, zonë.
pole – zona sipër (në veri) dhe poshtë (në jug) globit.
Kili dhe Argjentina – shtete në Amerikën e Jugut.
Australi – një kontinent i largët.
Ekuatori – rripi i vendeve që janë në mes të globit, pra të
baraslarguara nga Poli i Veriut dhe nga Poli i Jugut.

LEXOJ DHE KUPTOJ
Sa stinë kemi në vendin tonë?
Cilat janë karakteristikat e stinës së verës te ne?
Çfarë ndodh në Kili dhe Argjentinë kur te ne është verë?
Çfarë stine është në Australi kur festohet Viti i Ri?
Po në Ekuator, kur vjen stina e verës? Ç’karakteristika ka ajo?
Po në vendet polare, kur vjen stina e verës? Ç’mund të thuash për klimën në ato vende?

REFLEKTOJ
Cila stinë të pëlqen më shumë? Pse?
Të pëlqen të jetosh në vende që i kanë të katra stinët? Pse?
Si mendon se do të ishin ditët e tua nëse do të jetoje në Ekuator.

168