Page 19 - nuusbrief 1 2025.cdr

AKADEMIE

Verryking in ons Rekenaarsentrums

Elke RooiKat kry weekliks die geleentheid om tydens 'n
koderingsperiode te leer en te speel. Die koderingprogram bestaan
uit vyf boustene wat progressief van graad R tot graad 7 aangeleer
word. Hierdie boustene sluit in: patroonherkenning en
probleemoplossing, algoritmes en kodering, robotika, internet en
kommunikasie, asook toepassingstegnologie. Ons graad 4- tot Graad
7-Rooikatte het ook E-Wiskunde, E-lees en algemene
Rekenaarvaardighede saam met hulle koderingsperiode. Hierdie pad
van Graad R tot 6 begelei ons Rooikatte so goed, dat hulle in Graad 7
reg is om 'n eie HTML-webblad te programmeer.

Ons RooiKatte geniet beide die konkrete en digitale leerervarings
terwyl hulle hierdie waardevolle rekenaarvaardighede en -denke
bemeester!

Wat is kodering? En hoekom is dit nou skielik 'n algemene woord?

Felix Spies, stigter en hoof- uitvoerende beampte van die Siyafunda Education Foundation (SEF), is 'n dinamiese leier in STEM-
onderwys (STEM = Science, Technology, Engineering, Math) en verduidelik kodering soos volg:
Kodering is die proses om 'n programmeertaal te gebruik om 'n rekenaar opdrag te gee om spesifieke take uit te voer. Dit behels
die skryf van reekse van instruksies (kode) wat 'n rekenaar kan interpreteer en uitvoer. Kodering is fundamenteel vir die skep
van sagteware, toepassings, webwerwe en nog baie meer.

Die Departement van Onderwys het kodering, nou ingestel vanaf grondslagfase tot op graad 9-vlak. Vroeë blootstelling aan
kodering help om kritiese denke, probleemoplossing en logiese redenasievaardighede vanaf 'n jong ouderdom te ontwikkel.

Probleemoplossing

Kodering en robotika hou verband met probleemoplossing deur logiese en berekende denke – belangrike vaardighede vir die
toekoms. Kodering en robotika leer kinders om komplekse probleme in hanteerbare dele af te breek, logies te dink en stap-vir-
stap oplossings te ontwikkel. Deur by kodering en robotika betrokke te raak, ontwikkel leerders 'n ingesteldheid wat hulle toerus
om uitdagings kreatief en doeltreffend aan te pak.
Kodering is dus baie meer as net vermaak, want kodering:

• ontsluit 'n wêreld van kreatiewe moontlikhede. Kinders kan interaktiewe animasies ontwerp, hul eie stories bou met
vertakkende vertellings, of selfs speletjies skep wat hul vriende uitdaag.
• stel kinders in staat om hulself op unieke maniere uit te druk en hul idees in 'n digitale formaat tot lewe te bring. Stel jou 'n
kind voor wat lief is vir diere. Deur kodering kan hulle 'n interaktiewe animasie skep waar gebruikers verskillende dierefeite
kan leer of selfs 'n speletjie kan ontwerp waar hulle vir virtuele troeteldiere omgee.

Wat van te veel skermtyd wat breinontwikkeling kan beïnvloed? Felix beaam dat dit 'n geldige bekommernis is.

Oormatige skermtyd kan nadelig wees vir breinontwikkeling. Kodering kan egter 'n gesonde, skermgebaseerde aktiwiteit wees
wanneer dit met ander ervarings gebalanseer word. Die American Academy of Pediatrics beveel eintlik aan om kodering in
opvoedkundige ervarings in te sluit. Die sleutel is om 'n balans te vind en skermtydperke op grond van 'n kind se ouderdom te
stel.

• Moedig pouses aan en inkorporeer fisiese aktiwiteit deur die dag om verskillende areas van die brein te stimuleer.
• Verken “unplugged”-koderingsaktiwiteite soos die gebruik van bordspeletjies wat basiese koderingskonsepte leer. Hierdie
aktiwiteite kan die kernbeginsels van kodering bekendstel sonder oormatige skermtyd.

(Aangepas en verkort vanaf: afrikaans.com/ Skrywer: Annelie van Jaarsveldt/ Datum: 20 Augustus 2024)

DIS HÓÉ ONS DIE WÁT DOEN