Page 136 - ҚАЗАҚ ӘДЕБИЕТІ. 5-СЫНЫП. АТАМҰРА. СҮГІРБЕКОВА А.І.

ОТБАСЫ ҚҰНДЫЛЫҚТАРЫ

: – Отбасы ер-азамат пен әйел адамның заңды неке қиып,
отау тігуінен құралады. Отбасының басты қазығы, алтын
діңгегі – бала. Баланың тәрбиелі, жан-жақты болып өсуіне
берекелі, өнегелі, ынтымақты отбасының ықпалы мол.
Отбасын құрғанда адам өмірге ұрпақ әкеліп қана қоймай, соны­
мен бірге оған жалпыадамзаттық және ұлттық құндылықтарды,
ата-бабасының салт-дәстүрін жас ұрпақтың бойына сіңіреді. Ба­
лаларын өздерін қоршаған ортаға және қоғамға пайдалы азамат
етіп өсіру – ата-ананың ең маңызды міндеті.

: – Отбасындағы құндылықтар оның мүшелерінің қа­
рым-қатынасына құрылады. Отбасы мүшелері: әке, ана,
ата, әже, балалары және тағы басқа туыстар. Қазақ халқы
отбасы тәрбиесіне үлкен мән берген. Сондықтан отба­
сылық қарым-қатынасқа байланысты көптеген мақал-мәтелдер
пайда болған.
Мақал-мәтелдер

Қарындасың – қарлығашың.
***
Інісі бардың тынысы бар,
Ағасы бардың жағасы бар.

***
Ата – баланың қорғаны.
***
Атаның көңілі балада,
Баланың көңілі далада.
***
Бала – ананың бауыр еті.
***
Балалы үй – базар,
Баласыз үй – қу мазар.
***

Әкесін сыйламаған кісіні,
Баласы сыйламайды.

124