Page 109 - Балдарга 2023_Neat

ТЕЕРТПЕК

Теертпек эҥ ле кӱчтӱни бедиреп, кандый туулар ашпады деер, кандый
суулар кечпеди деер. Барып јадала, бир кобыда ӧлӧҥ чаап јаткан кижини
кӧрӱп ийди. «Акыр, кижинеҥ сурап укса кайдар» деп шӱӱди.
– Кижи, јер-телекейдиҥ ӱстинде эҥ ле кӱчтӱ сен бе?
– Мен эмей аа – деп, кижи айдала, Теертпекти тудала, азык салган
баштыгына божодып ийди.
«Азык бойы келди. Азыкка барбай, иштенетен турум» дейле, кижи
чалгызын алып, ойто ло иштене берди.
Бу ӧйдӧ Теертпек баштыктаҥ чыгып, агаштыҥ койу бӱрлерине кирип
јажынды. Анча-мынча болуп, эҥир кирди. Кижи ижин таштап, курсак
азарга шыйдынды. Јаан отты камызып, чай асты. «Акыр, Теертпекти
амзап кӧрӧтӧм» деп, азык салган баштыгын алды. Ары-бери тутты, кактап
кӧрди. Је Теертпек кайда да јок. Караҥуй тӱн кирип калган. Јуртка јетире
ыраак. Ичи-бууры кыйкырап, кижи уйуктаарга јатты. Эртен тура база
ла баштыгын тудуп кӧрди. Не де јок. Јанар дезе, аштаганынаҥ улам
буттарында тын јок, чой илип салгандый уур.
Теертпек кижини кӧрӱп кыйгырды:
– Не болгон, ӧрӧкӧн?! Чалкойто јадала, нени шӱӱп тураар?
– Эки кӱнге ӧтпӧк јибезеҥ, нени-нени шӱӱрдеҥ болгой, шӱӱле берериҥ!
– Јер-телекейдиҥ ӱстинде эҥ ле кӱчтӱ мен деп айдараарда, эмди канай
кӱчеер чыга берди? – деп айдала, Теертпек агаштаҥ тӱшти.
– Ӧтпӧк-теертпек јогынаҥ кӱч кайдаҥ келетен – деп, кижи араай
унчукты.
– Эмди билдеер бе, кем кӱчтӱ? – дейле, Теертпек мыкындарын тайанып
кӱлӱмзиренди.

109