Page 108 - Балдарга 2023_Neat

КӰНДӰЗЕК КОЙОНОК

Бир аркада Майчык деп кичинек койонок энезиле кожо јуртаган. Энези
Майчыкты койондор ортодо тоомјылу јӱрерге, ару-чек болорго, јаан
койондордыҥ сӧзин угуп јӱрзин деп, јаантайын ӱреткен. Оныҥ да учун
ол анаар-мынаар барбас, баштактанбас, сӧсуккур койонок болуп чыдап
калган.
Бир катап энези Майчыкты айыл сакып отурзын деп јакыды. Нениҥ
учун дезе, удабай ла олорго коштой аркада јаткан јажы јаан таай койон
келеечи болгон.
– Сен, Майчык, ары-бери баспа. Ол кертип салган капыстала, моркопло
таайыҥды кӱндӱлеп сал – деп, энези чыгып јадала айтты.
– Айтканаарла ла эдерим, эне – деп, Майчык јӧпсинди.
Энези керектерине јӱре берди.
Узак та ӧй ӧтпӧди. Кенетийин эжикти токылдадып, олордыҥ айлына
барбак куйруктарлу тийиҥештер киргилеп келди.
Майчык сакыбаган айылчыларга сӱӱнет. Олорды кӱндӱлеерге, курсак-
тамак салып, столго кычырды.
– Кандый тату моркоп! Кандый тату капыста! – дежип, тийиҥдер
курсакты мактагылап, чӱрче ле айакты куру этире јип ийдилер.
Майчык кӧрӱп турза, тийиҥештердиҥ столдоҥ туура турар кӱӱндери де
јок. Кӱндӱзек Майчык таайына арттырып салган капыста ла моркоптыҥ
артканын база ла салды. Айылчылар оны да тӱгезе јийле айдышты:
– Эмди бис тойдыс. Сеге, койонок, јаан быйан. Эмди сен биске айылдап
кел – дежип, олор јӱргӱлей берди.
Анча-мынча болбой, таайы келди. Майчык ал-санаага алдырып,
маҥзаарый берди. «Таайды неле кӱндӱлеер? Энемниҥ сурагын да
бӱдӱрбедим» деп санааркайт. Таайы керектиҥ аайын оҥдоп айтты:
– Калас шакпыраба, јееним. Мен тойу. Нӧкӧрлӧриҥди кӱндӱлегениҥ
сӱреен јакшы.

108