Page 133 - Ligji për tregtarët dhe shoqëritë tregtare - teksti me shpjegime

viteve punë dhe nuk duhet dhënë nëse shkëputja e marrëdhënieve të punës bëhet
për rezultate të dobëta.

2. Për më tepër, Forumi vlerëson se çdo rregull duhet të bëjë dallimin midis pagës së
drejtuesve në shoqëritë e regjistruara në bursë, në përgjithësi, dhe pagës së punës në sektorin e
shërbimeve financiare, për shkak të të ardhurave të mundshme të larta të anëtarëve të këshillit
pa detyra drejtuese brenda shoqërisë në këtë të fundit.” 120
Mirëpo, tema e këtij debati aktual është shumë më e gjerë se thjesht paga e punës së
drejtuesve dhe përfshin gjithë strukturat e shoqërisë, ku administratorët mund të kenë një
autonomi të konsiderueshme nga organet e tjera të shoqërisë që duhet t’i mbikëqyrin dhe t’i
mbajnë nën kontroll administratorët. Mbi të gjitha, në rast se detyrat e administratorëve kanë
zëvendësuar mekanizmat mbrojtës të lidhur me regjimin e ruajtjes së kapitalit, zbatimi i një
sistemi për shpërblimin e përshtatshëm të administratorëve të lidhur me performancën e
shoqërisë merr një rëndësi të veçantë duke u bërë një instrument shtesë i drejtimit të
brendshëm të shoqërisë. Komentet tona për nenin 70 tregojnë se, në Shqipëri, modeli i SHPK-
së sipas ligjit për shoqëritë tregtare e ka përfshirë tashmë këtë ndryshim. Për rrjedhojë, duhet
mirëpritur që ligji për shoqëritë tregtare ka përfshirë edhe elementin thelbësor të
rekomandimeve të BE-së për shpërblimin e administratorëve në nivel të SHPK-së.

3. Rekomandimet nuk synojnë të përcaktojnë standarde për rrogat e përshtatshme (kjo do
të ishte e vështirë të arrihej duke marrë parasysh shumëllojshmërinë e madhe të situatave të
shoqërive). Megjithatë, rekomandimet përfshijnë pjesëmarrjen e Asamblesë së Përgjithshme
në procesin e vendosjes së standardeve që, në rastin e SHA-ve, vendosen nga këshilli i
administrimit ose këshilli mbikëqyrës. Në këto kushte, skema e përfitimeve që u jepen
administratorëve (shpërblimi bazë apo stimujt, përfshirë pjesëmarrjen në fitimin e shoqërisë
dhe opsionet për aksione) duhet miratuar me vendim të Asamblesë së Përgjithshme (për
SHA-të shih, gjithashtu, parimin 5 të Kodit shqiptar të Drejtimit të Brendshëm të Shoqërive
Tregtare). Duke qenë se, zakonisht, SHPK-të nuk kanë struktura me këshilla, Asambleja e
Përgjithshme vendos si standardet e shpërblimit, ashtu dhe përfitimet personale. Neni 81, pika
1, shkronja “b” dhe “c”, dhe neni 97, pika 1 deri 4, përcaktojnë se shpërblimin e
administratorëve e vendos Asambleja e Përgjithshme. Përfitimet individuale duhet të
pasqyrojnë në mënyrë të përshtatshme detyrat e administratorëve lidhur me këtë skemë dhe
gjendjen financiare të shoqërisë (neni 97, pika 2). Nëse shoqëria është në vështirësi serioze
financiare, Asambleja e Përgjithshme mund të vendosë reduktimin e shpërblimit të
administratorëve në masën e përshtatshme (neni 97, pika 3). Skema e përfitimeve dhe
shpërblimi individual që u jepet administratorëve, si dhe efekti vjetor i shpërblimit të
administratorëve në strukturën e kostove të shoqërisë tregtare publikohen së bashku me
pasqyrat financiare vjetore (neni 97, pika 4).

120 Shih http://ec.europa.eu/internal_market/company/ecgforum/index_en.htm

132