Page 15 - ARTEMIS_Nr.9 (Weihnachten 2021)

Franz Geissler

A guida Whisky(© Franz GEISSLER)

D‘ Buaga Rousl houd si an echtn Schottn aunglochd,

wia s vuar etla Joahr duart houd a Praktikum gmochd.
Mit deïn is s hiaz schoun fufzeïhn Joahr banaund

und houd nanmidgnaumma zu ins her ins Burgnlaund.
Er houd si ah schoun aun d Sproch dou gweïhnd,

oubwuhl man nau aun sein Akzeïnt ois Ausläinda dakeïnnd.

Seini oidn Breich aus Schottlaund houd a gaunz ogschriebm,
niar sei extreme Spoarsaumkeit is eahm bliebm.

Dazui oa Beispül: da Arthur, da Rousl iahr Maunn,
kimmt nouch läingarn Woartn eïndli ba sein Zauhnoarzt draun.

Er griaßt eahm freindli, huckt si in Behaundlungsstuhl
und frougt glei, oub a schouns Maül aufmocha sull.

„Jo!“, sogt da Doukta, und schaut eahm nei(n),

faungt owa glei drauf eïntseïtzt aun zan schrei(n):
„Jo Heulaund da Wöld, sou a kuhlschwoarzi Zungan hon ih nau guar nia gsehgn!

Sogn s oamul, is eahna dou wos gschehgn?
A-n-Unfoi, oda eïppa a-n-aundaschsts Malhear?

Wou hobm deïnn seï a sou a schwoarzi Zungandahear?“
„Da Whisky“, auntwuart’t da Arthur, „is aun oin deïm Schuid!

Ih homma näimlich geïstarn naumittoch ban Houfa oan ghuid,

im Soundaaungebout. A Floschn Highland Single Malt!
Natiarli hon ih nid damit grechnd, dass ma deï owifollt

vua da Diar! Dabei is deï Floschn vöülli zabroucha

und ois houd nouch deïn guidn Whisky daunn groucha!
Geistesgeïgnwärtich hon ih eahm eh glei aufgleckt voun da-r-Eard!

Wouhear häd ih deïnn wissn sulln, dass deïs Platzl vuar n Gschäft woar frisch teeard?“