Page 20 - ARTEMIS_Nr.9 (Weihnachten 2021)

Franz Geissler

Weihnocht’n 2021 (© Franz GEISSLER)

Heia gibt ‘s schoun s zweiti Mol Corouna-Weihnochtn
und miar miassn wieda neichi Vuarschriftn beochtn,
dass ins mid Omikroun nid a fümpfti Wölln dapackt
und in Jäinna daunn wieda-r-in an Lockdown prackt!
Hobts eh schoun an Covid-19-Beauftrogtn bestimmt,
dear in Christkindl seini Kountaktdatn aufnimmt
und dear a schaut, oub s a FFP2-Maskn trogt,
weul sicha is sicha, houd da Gsundheitsminista gsogt.
Immahin kimmts jo voun weit dahear,
und waunn s aungsteïckt warad, warad deïs a Malhear.
Gimpft muiss s owa eh nid sein, und ah koan Test brauchts mid,
fiar Kinda unte Zwoülfi göültn näimlich deï G-Regln nid!
Goud sei Daung kimmt zu ins eh nid da Santa Claus,
weul dou schauads schoun gaunz aundaschts aus!
Wear woaß schoun, voun wou dear daherkimmt
und wos fiar a Routn dass a dabei nimmt?
Wear gaunz sicha sein wüll, bleibt alloan daham
und huckt si midsein Laptop vuarn Weihnochtsbam.
Daunn hoit a pear Videokoufareïnz Kountakt zu seini Liebm,
weul deï sein ah olliisolieart und gschützt dahoam bliebm!
Sou is a vurn Virus sicha und sandlt ah koan aundan aun:
„Homecelebrating“ hoaßt ma a sou a Famülienfeia daunn!