Page 102 - Балдарга 2023_Neat

ТООЛОРДЫҤ КЕРИШКЕНИ

Бир катап эҥирде тоолор jуулыжып керишкен. Тогус jаан бажын бӧкӧйтип
кыйгырды:
– Тоолордыҥ мен эҥле jааны, айдарда, мен слерди башкарарым!
– Jок ло туру – деп, чарбак карынду Сегис айтты.
– Мен эҥле кӱчтӱ, мен jааны болорым.
Jети нени де айтпай, ӱргӱлеп отурды.
Јӱзинде кӱлӱмјизин јажырбай, Алты ӧрӧ турала, тату ӱниле айтты:
– Тогус, бис экӱниҥ башкабыс jок. Сени аҥтара тургузып ийзе, алты
боло берериҥди билип туруҥ ба? Айдарда, бис экӱ эҥле jааны бололы.
– Бешке ле jедер тоо jок болбой, карындаштар. Балдарды эҥ ле артык не
сӱӱндирет? Кӱнликте турган «беш» эмей – деп, Беш ичкери басты.
– «Тӧрт» тӧ коомой эмес ле – дейле, бажын тырманып, Тӧрт тура jӱгӱрди.
– Тӧрт jокко сениҥ иштенетен столыҥ да турбас, маҥтап бараткан кӧлӱгиҥ
де jӱрбес. Ӱч кӧлӧсӧлӱ машинаны кем кӧргӧн? – деп, Тӧрт jарсылдада
каткырды.
– Ӱч кӧлӧсӧлӱ машиналар бар... Jе ас. Мени де балдар сӱӱйт. Анчадала
jалку балдардыҥсӱӱген темдеги – мен! – деп, Ӱч коркок белин тӱзедип
кыйгырды.
Кенетийин кӱҥӱреген ый угулды. Кӧрӧр болзо, Эки анаар ла ыйлап
турган эмтир. Тоолор чочып, не болды деп сурагылайт.
— Не де болбогон. Мен – неге де керек jок тоо. Туку мында Аржанныҥ
кӱнлигине келеримде, ол мениҥ jалмажымды jок эдип кырала, ӱстине
«беш» бичип алган. Карын, ӱредӱчи мыны кӧрӱп, Аржанды тапту арбайла,
мени jаан этире бичиген эди. Балдар мени кӧрзӧ лӧ каткырыжар, куйрукту
деп айткылаар.

– Ыйлаба, Эки – деп, оны Тогус токунадат. – Экинеҥ артык тоо jок
болбой. Jӱрӱм бастыра эжерлӱ. Jаҥыстаҥ не де jӱрбейт. Кандый бир ӧзӱмди
jаҥыскан отургызып сал, ол качан да тӱжӱм бербес.
– Мен – Бир! Мен эҥ ле jааны болор учурлу – деп, тумчугын салактадып
алган Бир деген тоо ичкери басты. – Бодозоор до, баштапкы jер учун кем
чырмайбайт? Ого кем jӱткӱбейт?
Кенетийин Ноль тоолонып келеле, Бирдиҥ оҥ jанына турала айтты:
– Кӧрӱгер де, бис экӱ биригип, ончогордоҥ jаан боло бердис. Бис экӱ
слерди башкарарыс.
Оноҥло бери Бир ле Ноль биригип, Он бололо, тоолордыҥ jааны болуп
калганы ол.

102