Page 80 - Балдарга 2023_Neat
P. 80
ТЫРМАК ЛА МОЙЛО
Мойло – качан да јалкуурбас ийт. Таҥ атса ла, мееске чыгара маҥтаар,
ӧркӧлӧрлӧ сӱрӱжер. Ӧркӧлӧр Мойлоныҥ сӱмелӱзин, капшуунын јакшы
билгилеер. Оныҥ учун «сыйт-сыйт» деп калактажала, ичегендеринде
бӧктӧнгилеп алар. Јажынарга оройтып калган ӧркӧлӧр Мойлого јем болуп
калатан.
Мойло, кезик ийттер чилеп, качан да уйуктап, амырап јатпас. Јуртты
эбирип, ончо ийттерле јакшылажар, куучындажар.
Балдарга јолукса, куйругын булгап, олорго сӱӱнип, бийик-бийик секирер.
Уулчактардыҥ айткан сӧзинеҥ качан да чыкпас. Туура чачылган мечикти
тумчугыла ийдип, балдарга экелип берер. Јаш балдарга качан да ӱрбес.
Карган улусты тоор. Јыламаш јаанактыҥ тудунчак-сумказын тиштенеле
апарарга болушканын ончо улус кӧргӧн.
Кайдаҥ-кайдаҥ јем, курсак таап алза, јаҥыскан јибес. Тырмак деген
кырса ийдичекке келип, оны тапканыла кӱндӱлеер. Быйанду Тырмак
Мойлоныҥ алдына јада тӱжӱп, ойноорго албаданар. Мойло најызыныҥ
кӱӱн-санаазын билип, ойынга тӱрген кире берер.
80
