Page 87 - Балдарга 2023_Neat

– Јарайт. Јакшы айттыҥ. Онойдо ло бичиирис.
Эртенгизинде Айучак ла Койонокко Бӧрӱ туштады. Бӧрӱ Койонокко
кыјыраҥ кӧрӱп, је Айучактаҥ јалтанып, ыраакта ла турды.

– Бӧрӱчек, јурукка тӱжер кӱӱниҥ бар ба? – деп, Айучак сурады.
– Јараш јураар болзоор, тӱжерим – деп, Бӧрӱчек ӱнин јымжадып айтты.
– Ол чаал тыттыҥ алдына отур.
– Мынайда отурза кайдар – дейле, Бӧрӱ буттарын чалый салды.
Айу бажын тырмап, чаазынды јайып, та нени де сананала айтты:
– Јакшы шӱӱлте келди. Бӧрӱ, сен јараш чечектер тудунып, Койонго
сыйлаарга турган чылап, тизеленип ал. Койонок дезе кӧстӧрин сӱӱнчилӱ
эделе, сеге удура колдорын чӧйип алзын.
– Адам кӧрзӧ, арбанар – деп, Бӧрӱчек мойножорго турарда, Айучак оны
мекеледи.
– Јурукта не ле болор аргалу. Адаҥнаҥ коркызаҥ, јӱрӱм де јӱрбезиҥ.
Айучактыҥ айтканыла, Бӧрӱчек ле Койонок эптӱ јараш тургулап алды.

Бу јурукты Айучак кечегизине кӧрӧ капшай божотты.
– Бу јурук меге јарабайт! – деп, Бӧрӱчек кыйгырды. – Койон ло бис ка-
чан нӧкӧрлӧр болгоныс?
– Эмди болороор. Бис – тайга-таштыҥ аҥ-кужы! Ончобыс бой-бойыска
болужып, нӧкӧрлӧжип јӱрер керек – деп, Айучак кезем айтты. – Јуруктыҥ
алдына мынайда бичим саларым:
Койонок ло Бӧрӱчек –
Эмди јуук нӧкӧрлӧр.

– Је болгой ло. Јанатам – дейле, Бӧрӱчек кӱӱн-кӱч јок басты.
Айучак ару чаазынды, карандаштарды ла фломастерлерди Койонокко
берип айтты:
– Койонок, сен јурукка кирдиҥ, эмди мени јурайтан туруҥ.
– Ол чечектердиҥ ӧзӧгине отурып алгайыҥ.
Айучак чечектердиҥ ӧзӧгине отурды. Койонок та нени де кожоҥдоп,
сӱӱнчилӱ јурап баштады.
Узак отурышка Айучак арып-чылайла, ӧлӧҥгӧ чалкойто јада берди.
– Амырап ал, Айучак! Мен јурукты божоттым, келип кӧр.
– Нениҥ учун бис экӱ? – деп, Айучак јуруктаҥ бойын ла Койонокты
кӧрӧлӧ сурады.
– Бис экӱ бе? – Койонок сӱӱнди. – Айучак ла Койонок – эҥ јуук нӧкӧрлӧр.

Оныҥ учун бу јурукта бис экӱ болор учурлу.
– Чын айттыҥ, Койонок. Алдына нени бичиирис?
– Најылыкка сӧстӧр кӧп табылар. Санаама мындый сӧстӧр кирди. Уксаҥ
да:
Кем јакшы нӧкӧрлӱ,
Јӱрӱмде ол тузалу.

87