Page 94 - Балдарга 2023_Neat

JАҤЫ ӦДӰК

Адазы Аматка jап-jаҥы ботинка садып берди. Качан магазинде ӧдӱкти
алып турарда, ботинка Аматтыҥ будына ӧп лӧ ӧй болгон. Айылга келеле
кийерде, ӧдӱк буттарын тудуп, кыпсып, базарда сабарларын ачыдат. «Бир

эмеш кийзем, чӧйиле бербей» деп, Амат ичинде шӱӱп, ӧдӱгин кийеле, тыш-
кары чыкты. Эмеш базала, токтой тӱшти. «Jок, бу ӧдӱк меге тапчы. Айса
болзо, оны ойто магазинге апарала, солыырга келижер. Оны кирлебей, тур-
гузып салар керек» деп Амат сананып, ӧдӱктиҥ таманындагы тоозынды
колыла арчыды. Айылга бурылып, ӧдӱги керегинде ада-энезине нени де
айтпады. Бу jараш ӧдӱк магазинде сок ло jаҥыс болгон. Ойто табыштырып
ийзе, мындый ӧдӱк болор, та jок.
Эртен тура Амат ӧдӱгин кийип ийерде, бот сеге, ойто ӧп лӧ ӧй.
Ӱчинчи кӱнде ӧдӱгин кийгежин, ол ойто ло буттарын тудат. Ойноп чы-

гала, ойто аксаҥдап jанды.
Тӧртинчи кӱнде Амат ӧдӱгин эки катап кийген. Баштапкы катап ӧдӱги
ӧп лӧ ӧй болгон, экинчи катап кийерде, ойто ло тапчы.
Бу кандый саҥ башка ӧдӱк. Канайып ла ӧчӧжип билер. Мындый ӧдӱкти
канайып кийетен деп, Амат адазына куучындады.
Адазы кӱлӱмзиренип айтты:
– Уулым, ӧдӱкти чын кийерге ӱренер керек. Сол буттыҥ ӧдӱгин – сол
бутка, оҥ буттыйын – оҥ бутка.

94