Page 170 - Getroud met 'n Leuen

NabasDiep VERLIEF OP 'n LEUEN

innerlike denke en wese van jou, wetende dat die risiko baie groot is en dan nog steeds besluit
om kwesbaar te wees.

Die eenwordingsproses in die huwelik wentel hoofsaaklik rondom die vyf aspekte van die
lewe. Daar is natuurlik baie meer, maar ons fokus op: respek, begrip, vertroue,
openhartigheid en ervaring. Hierdie vyf elemente kan ook saamgevoeg word in die Bybelse
term van onderdanigheid. Ons wil so graag die woord onderdanig in die Bybel beskryf in dat
dit sou beteken die een moet op die ander se kop sit. Onderdanigheid, en nou praat ons van
Bybelse onderdanigheid, het niks met narsiste en baasspelerigheid te doen nie, maar word
saamgevat in die vyf begrippe van:

My respek vir my maat veroorsaak dat ek vir hom/haar bo alles en almal op aarde stel en
nooit iets slegs van hom sal sê of suggereer nie, en nooit vir hom met iemand anders sal
bespreek nie. Liefde as respek wil jou maat ondersteun ten opsigte van daardie kwaliteite wat
waardering uitlok en beteken dat jy agting het en bewondering koester vir jou maat se
voortreflikhede en vermoëns. Ten diepste is dit ’n respek vir jou maat se lewensbeskouings,
norme en waardes wat opbouend en verheffend is. Liefde moet verheffend en opbouend
wees, sodat man en vrou mekaar met mooi dinge, edel gedagtes en konstruktiewe
lewenshoudings kan verryk. Die respek van die liefde hang nou saam met die estetiese aspek
van die huweliksliefde. Dit wil sê: jy waardeer en bewonder die skoonheid van jou maat se
liggaam en die uniekheid van sy/haar persoonlikheid en lewensoortuigings. Die gedagte is dat
ek my maat se voortreflikhede sal bewonder en hom sal ondersteun ten opsigte van die
kwaliteite wat hom uniek maak.

Liefde as begrip beteken dat jy jou maat verstaan as ’n unieke persoon wat anders is as jy,
met sy eie lewensruimte, reg tot spasie, opinie en belangstellings. Begrip is daardie vermoë
om jou te plaas in die posisie van iemand anders om dan deur sy oë te kyk; deur sy hart te
voel; deur sy gedagtes te dink. Dit is tipies soos die empaat van vroeër! Begrip hou rekening
met die feit dat ’n man en ’n vrou as mense gelykwaardig is, maar dat daar 'n goddelike orde
is waarvolgens kinders van God mekaar moet bejeën, maar dit beteken ook dat ons nie
gelyksoortig is nie. Die man en die manswêreld is dikwels meer taak-georiënteer; direk fisiek
in die liefdesverhouding; onmiddellik seksueel gestimuleer; logies-beredeneerd in
lewensbeskoulike sake. Die vrou en die vrouwêreld is dikwels meer intimiteit-georiënteerd;
sterk meelewend en emosioneel in die liefdesverhouding; in die seksuele meer ingestel op
waardering en persoonlike kommunikasie; diepsinnig en waardegerig in die algemene
lewensbeskouing..
Liefde as begrip behels ook nugterheid wat verskille kan raaksien vir wat dit is, en probeer om
deur te dring na die persoon daaragter. Liefde as begrip word ’n deernisvolle sensitiwiteit
wanneer dit leer om te luister na die maat se sielsbehoeftes en probeer om sy gevoelens te
begryp. Só ’n meelewende begrip vir jou maat mond vanself uit in tere sorgsaamheid. 'n Mens
behoort jouself voortdurend in jou maat se posisie te plaas deur uit sy hart te probeer voel;
deur sy ore te luister; deur sy oë na dinge te kyk. Ek is besorg oor my maat se welsyn en stel
opreg belang.

* Verwys asseblief na die Verkorte Woordelys agter. 170